Baza e PD në Shkodër, sherr me Flamur Nokën për kandidatin e sjellë nga Tirana

SHKODER - Debate të ashpra, deri në grisje të fletëve të votimit janë shënuar në zgjedhjet për grupseksionet në PD-në e Shkodrës. Pavarësisht kontestimeve që ka pasur në disa prej grupseksioneve, ngjarja më e rëndë është regjistruar në Grupseksionin 3/2 në qytetin e Shkodrës. Shkak për debatet, e ashpra ka qënë mungesa e komisionerëve të dy kandidatëve në garë ditën e shtunë ku u mbajtën edhe zgjedhjet për grupseksione.

Në garën për kreun e këtij grupseksioni kanë qënë Nesti Kiri, Lazarin Vila dhe Jozef Sermi. Që në nisje të procesit në propozimet për të garuar, dy kandidatët dhe mbështetësit e tyre nuk kanë dashur që në garë të jetë Nesti Kiri, një emër i njohur për PD-në e Shkodrës pasi sipas tyre ai ka pashaportizimin në Tiranë dhe sipas tyre kjo në bazë të statutit nuk lejohet. Megjithatë Kryesia e PD, e ka hedhur poshtë pretendimin e tyre duke lejuar që të garojë për postin e Kryetarit të Grupseksionit Nesti Kirin.

Burime për Report Tv, bëjnë me dije se dy kandidatët Jozef Sermi dhe dhe Lazarin Vila, nuk kanë sjellë komisionerët për mbarëvajtjen e procesit në këtë grupseksion dhe këtu është edhe fillimi i kësaj historie debatesh në PD-në e Shkodrës.

Duke iu referuar po të njëjtave burime, mësohet se Kandidati Nesti Kiri, së bashku më mbështetësit e tij në Partinë Demokratike, pasi kanë pritur më shumë se një orë që dy kandidatët e tjerë të sillnin komisionerët, kanë marrë kutinë e votimit së bashku me fletët e votimit dhe kanë shkuar pranë selisë së PD Shkodër aty ku janë takuar me të deleguarin e qëndrës Flamur Noka.

Në këtë moment ka mbërritur edhe Zef Gjoni, një prej mbështetësve më të vjetër të PD-së së Shkodrës i cili ka nisur debatin me Nokën, ndërkohë që është shprehur se në këtë grupseksion nuk do të ketë zgjedhje dhe në këtë moment ka grisur edhe fletët e votimit së bashku me kutinë prej kartoni që është caktuar për të hedhur votat anëtarët e grupseksionit 3/2 në Shkodër.

Noka, me tone të ngritura i është drejtuar Gjonit, se ky person është mësuar kështu të veprojë prej 28 vitesh në PD-ne e Shkodrës duke tentuar që të marrë me forcë atë cfarë dëshiron por tashmë kjo gjë ka marrë fund.

Në këtë moment Kryesia e PD ka vendosur që procesi i zgjedhjeve të anullohet ndërkohe që pritet që gjatë këtyre ditëve të merret edhe një vendim tjetër për procesin e zgjedhjeve, ku nuk përjashtohet mundësia që Kryesia e PD të vendosë të përjashtojë nga gara të tre emrat e përzgjedhur duke I kërkuar anëtarëve të bejne propozime të reja.

/b.ha./Shqiptarja.com

TAG:
• Shkoder
• zgjedhjet ne pd
• pd e shkodres
• sherr ne pd