BE kritika për të arrestuarit nga
Media në Turqi: Anti-demokratike

Zyrtarët kryesorë të Bashkimit Europian kanë kritikuar ashpër arrestimet masive të përfaqësuesve të medias në Turqi. Shefja e Marrëdhënieve me Jashtë, Federica Mogherini dhe komisioneri i BE-së për zgjerim Johannes Hahn, i kanë konsideruar këto arrestime “kundër vlerave Europiane”. Në një deklaratë Mohgerini dhe Johannes Hahn kanë theksuar se anëtarësimi drejt Bashkimit Europian varet në “respektimin e plotë të rregullave ligjore dhe respektimin e të drejtave themelore”, duke shtuar se arrestimet ndaj përfaqësuesve të medias janë të “papajtueshme me lirinë dhe parimet demokratike”.
 
Ata kërkuan hetim dhe investigim të drejtë ndaj të akuzuarve, të cilët nga ana e tyre shprehen se nuk kanë përse të tremben pasi “frika është shenjë e atyre që kanë kryer krime”.
 
Të paktën 24 persona u arrestuan në bastisjen policore në një gazetë të përditshme dhe një stacion televiziv, media pranë partive opozitare. Të arrestuarit janë akuzuar për “tentativë në kontrollin e shtetit”.
 
Gazeta “Zaman” dhe kanali televiziv “Samanyolu” janë media pranë klerikut islamik Fetullah Gulen, kritiku kryesor i Presidentit të vendit Rexhep Taip Erdogan.
 
Gulen i vendosur në SHBA, është lideri shpirtëror i lëvizjes “Hizmet”, dhe akuzohet nga Presidenti Erdogan për konspiracion në drejtimin e një shteti paralel në Turqi. Edhe kryeministri i vendit Ahmet Davutoglu është shprehur lidhur me këto arrestime se ata që konspirojnë kundër qeverisë do të mbajnë përgjegjësi.

Redaksia Online
(e.s/shqiptarja.com)

TAG:
• johannes hahn