Berisha: Aleanca
e plehut s'ka të ardhme

TIRANE- Nga parku energjetik i Porto Romanos ku mori pjesë në përurimin e impiantit të parë të prodhimit të biokarbureve në Shqipëri, kryeministri Berisha sulmon programin “Rilindja Shqiptare” të opozitës dhe propozimin për rritjen e taksave ndaj të pasurve.

“Ata të cilët besojnë se mund të zhvillojnë vendin duke u vërsulur me taksa ndaj të pasurve, u kujtojnë shqiptarëve një kohë të cilën ata kurrë nuk do ta pranojnë më “- tha Berisha.

Ai e cilësoi impiantin, si një investim mjaft I rëndësishëm që shumë shpejt do e kthejë Shqipërinë në një eksportuese të biokarburve për Italinë dhe Evropën.
Duke nënvizuar objektivin e qeverisë për ruajten e mjedisit, si një përparësi madhore, Berisha sulmoi ata që ai i quajti, antiglobalistë duke i akuzuar se nuk kërkojnë mbrojtjen e mjedisit, por votat në plehra.

“Më duhet tu them antiglobalistëve, se nuk keni të ardhme se aleanca e juaj e fundit, të cilët qytetarët e rëndomtë, po e quajnë aleanca e plehut është e dëshpëruar e pashpresë. Se ju nuk promovoni aspak mjedisin e shëndetshëm, por kërkoni të rrëmoni vota në plehra, dhe ato nuk do i gjeni ndonjëherë”.

Berisha premtoi se qeveria do të marrë të gjitha masat lehtësuese për të siguruar një mjedis miqësor për investimet në këtë fushë dhe ftoi qytetarët të tregojnë vëmendjen më të madhe ndaj ruajtjes së mjedisit, po ashtu dhe ojq-të mjedisore që të jenë më active në këtë drejtim.

Impianti është bashkëpunim i dy kompanive shqiptare dhe italiane, dhe është një investim prej 5 milionë euro dhe me një kapacitet prej 100 mijë ton biokarbure në vit.

(s.g/shqiptarja.com)