Berisha në Lezhë, vijon sulmet për Yuri Kim dhe Sorosin: Kërkonin të mos kishte opozitë në Shqipëri! Rama të mos gabojë që të lëvizë rrugën tonë drejt BE

“Fatkeqësisht të dua më shumë se fëmijët e mi”. Kështu i tha ish oficeri i gardës Sali Berishës gjatë takimit me mbështetësit në Lezhë. Ai nuk hezitoi të komentonte Gazment Bardhin dhe Lulzim Bashën, për të cilët tha se janë “lepuj që i hamë me dhëmbë”.

 “I nderuar doktor, jam oficer i gardës së republikës, ish i juaji personalisht. Vij nga Fani, jam mbështetësi juaji deri në vdekje, jo më shumë. Të përshëndes, ju dhe grupin nismëtar. Por kam një keqardhje, për ata lepujt, Lul Basha, Gaz Bardhi dhe ato qelbësirat që ne i hamë me dhëmbë, i shqyejmë lepujt.

Dr. Berisha të njoh nga afër, të kam shoqëruar ku ke shkel me këmbë, në 1997 padiskutim,  Skënderbeu i madh je padiskutim. Të dua fort, fatkeqësisht të dua më shumë se fëmijët e mi. Zoti ta priftë mbarë dhe ne na ke me vete”, tha demokrati.

Një demokrat ka kujtuar momentin e rrëzimit të Sali Berishës në Kuvendin e PD duke i lënë fajin shoqëruesit të ish kryeministrit. Komenti i tij shkaktoi të qeshura mes demokratëve në Lezhë dhe vetë Sali Berishës e Floriana Garos.

“Atë ditë, më je dhimbtur që je rrëzuar por i ka fajet shoqëruesi. Edhe me qenë 30 vjec, i ka fajet shoqëruesi. Të mos e bëjë më atë gafë, të përshëndes”, tha mbështetësi i ish kryeministrit.

Në betejën për të rimarrë drejtimin e PD, Berisha i dha një mesazh të prerë kryeministrit Edi Rama duke i thënë që të mos lëvizë rrugën drejt BE. Për këtë iu referua intervistës së tij në Bruksel ku tha mbeten në pritje të presidencës franceze dhe theksoi se situata e ngërçit nuk do të qëndrojë gjatë pasi do të ndryshojnë kurs.

Opozita ka bërë kërkesë për mocion për debat në parlament, por Berisha ka hequr firmën pasi konsiderohet si "i vdekur politikisht" nga mazhoranca, e cila nuk pranon asnjë kërkesë që vjen me emrin e tij. Ndër të tjera, në takimin me demokratët në Lezhë, Berisha përmendi se si në gjysmën e dytë të vitit 2021, rikthyen në Shqipëri opozitën e vërtetë dhe nuk ndali sulmet ndaj George Soros dhe ambasadores Yuri Kim. 

“ U anëtarësuam në NATO, hoqëm vizat, morëm statusin para zgjedhjeve. Mos harroni se Edi Rama bllokoi statusin me tre ligje, me tre këshilltarë të Fierit. Shumë shqiptarë menduan se nuk e ka kundër Europës, por për qëllime politike, për ta mposhtur Berishën dhe për të fituar zgjedhjet. Por çfarë ndodhi këto 8 vite, më thoni pak? Cilat janë hapat? Asnjë! Dhe tani del e thotë në Bruksel se, “po nuk na e dhatë, do të shohim drejtimin”.

Drejtimin, po ia themi këtu, mos gabo ta lëvizësh qoftë edhe një milimetër, se drejtimi ynë është vetëm Europa e Bashkuar, vetëm Bashkimi Europian. Nuk ka drejtim tjetër për ne! Paraardhësit tuaj kanë luajtur me fatet e këtij populli, me identitetin e tij, me dinjitetin e tij, por ti kurrë nuk do të mund ta spostosh as drejt Beogradit, as drejt Stambollit, identitetin dhe dinjitetin e shqiptarëve. Shqiptari do të jetë shqiptar në të gjitha kohërat në vokacionin e tij Perëndimor.