Berisha: Rama bën ciu-ciu
ka frikë se do humbë vota

TIRANË – Kryeministri Berisha ka ironizuar mënyrën e zgjedhur nga opozitari Edi Rama për të kominkuar në rrjetet sociale me qytetarët. Berisha tha se kryesocialisti Rama e përdor Twitter-in sepse i trembet humbjes së votave nëse del në media, siç ka bërë rregullisht.
“ Rama është zotëria që rrin ciu ciu. E bën sepse i kanë thënë të mos dalë në media se humbet vota, ndaj bën ciu ciu. Por, me këtë mënyre nuk bind as njerëzit e partisë së tij e jo më qytetarët”, tha Berisha këtë të hënë.
Sipas kreut të qeverisë, kryesocialisti Rama vuan modelin e suksesshëm ekonomik të qeverisë Berisha.
“Ai thotë janë një million të papunë. Në 2009 ishte i vetmi që u tha shqiptarëve se qeveria nuk do rrisë rrogat. Ndërsa ne e afruam këtë rritje vetëm që mos përkonte me zgjedhjet. Në 2010, Rama tha se rritja e rrogave është akt kriminal. Në atë kohë nuk bënte ciu – ciu, por dilte në konferencë. Këtë gjë e ndryshon sipas këshilltarëve”, deklaroi kryeministri.
“Te rruga e re “Murat Toptani” Rama i ka ndaluar deputetët socialistë që të kalojnë. Edhe për të shkuar në Kosovë Rama i bie nga Maqedonia se ka frikë nga tuneli i “Rrugës së Kombit”, tha Berisha.
Në mbledhjen e deputetëve demokratë, kryeministri përsëriti se vendi do njohë një rritje të re ekonomike pavarësisht krizës në Europë. Ai akuzoi të majtët se ndjellin panik, nisur vetëm nga humbjet e tyre personale.
“Bashkia e Tiranës në 4 vjet, ndonëse i 3 -4 fishoi taksat mbi qytetarët dhe binzeset, asfaltoi gjithsej 12 km rrygë e rrugica dhe bllokoi 2 vjet Tiranën me projektin e qendrës”, nënvizoi Berisha, ndërsa përsëriti se se qeveria do bëjë gjithcka për të rritur nivelin ekonomik.

(aq/shqiptarja.com)