TIRANË - Inflacioni gjatë muajit dhjetor të vitit të kaluar ka shënuar rënie të mëtejshme, duke kaluar nga 1.7% në nëntor, në nivelin e 1.6 përqindëve. Ky nivel është nën kuotën minimale, të parashikuar nga Banka qendrore, e cila preferon rritje të çmimeve nga 2 deri në 4 për qind. Inflacioni i ulët ndikon në uljen e prodhimit vendas, duyke qenë se pasqyron një rënie të kërkesës në treg. Sipas njoftimit të INSTAT-it, një vit më parë ndryshimi i çmimeve ishte 3.3 për qind. Indeksi i grupit “Ushqime dhe pije jo alkoolike” shënoi një rritje prej 1.4 përqind krahasuar me muajin e mëparshëm. Brenda këtij grupi rritja më e madhe prej 8.9 përqind vërehet në nëngrupin “zarzavate përfshirë patatet. Indeksi i grupit “Veshje dhe këpucë” ka shënuar një ulje prej 0.1 përqind, ulje kjo që ka ardhur kryesisht si rezultat i uljes së çmimeve të veshjeve. Indeksi i grupit “Transporti” shënoi një rritje prej 1.3 përqind. Gjatë muajit janar çmimi i naftës shënoi një rritje prej 1.8 përqind dhe çmimi i benzinës një rritje prej 1.0 përqind.
Banka e Shqipërisë ka dhënë prej kohësh njoftime se po konstatohet ulja e inflacionit dhe për këtë arsye ka ulur tri herë rresht normën bazë të interesit për lekun. Por, sipas ish-guvernatorit të BSH Shkëlqim Cani, ky veprim ka qenë i vonuar dhe, me sa duket, ai nuk po sjell rezultatet e duhura në treg.

(aq/shqiptarja.com)