Një “automail” i dërguar në vitin 2013 nga Jeffrey Epstein vetëvetes, në të cilin ai flet për sëmundje veneriane që Bill Gates dyshohet se i ka marrë gjatë marrëdhënieve me prostituta ruse, për kërkesa për antibiotikë që duhej t’i jepeshin fshehurazi bashkëshortes Melinda dhe për detaje të tjera tronditëse, mund të jetë goditja përfundimtare ndaj reputacionit të themeluesit të Microsoft-it. Kjo ndodh pavarësisht faktit se Gates i ka quajtur të rreme akuzat e dala nga dokumentet e reja mbi skandalin e financierit pedofil, i cili vdiq në burg në rrethana të dyshimta, zyrtarisht i vetëvarur.

Sa i përket imazhit publik, Bill Gates – sot 70 vjeç – ka kaluar nëpër tri faza të ndryshme. Para vitit 2000 ai shihej si gjeniu i teknologjisë: një “nerd”, ndoshta autik (siç e ka përshkruar veten në autobiografi), që përmes Microsoft-it e bëri internetin, deri atëherë një mjet për pak veta, të aksesueshëm për masat.

Në dy dekadat e fundit të shekullit XX, Gates (Microsoft u themelua në vitin 1975) ishte një pionier, por edhe një teknokrat i pamëshirshëm: i ashpër me punonjësit dhe i gatshëm të përdorte goditje nën brez në luftën me konkurrentët, nga Netscape te Apple. Në dy dekadat e para të shekullit XXI, gjithçka ndryshon. “Baroni grabitqar” i epokës digjitale shndërrohet në filantropin më bujar të kohës sonë, duke premtuar se bashkë me bashkëshorten Melinda do të dhurojë mbi 99% të pasurisë familjare, ndërsa tre fëmijëve do t’u lërë vetëm “thërrime” – rreth 10 milionë dollarë secilit.

Gates shndërrohet në një figurë pothuajse të shenjtë, dhe jo pa arsye: falë programeve të tij, sëmundje endemike si dizenteria zhduken nga zona të mëdha të Afrikës, ndërsa fushatat kundër AIDS-it, për arsimin dhe klimën japin rezultate të rëndësishme. Deri më sot, Gates ka dhuruar rreth 100 miliardë dollarë për bamirësi dhe ka bindur miliarderë të tjerë – duke filluar nga Warren Buffett – të angazhohen për të dhuruar të paktën gjysmën e pasurisë së tyre.

Por pikërisht në vitet e suksesit maksimal, në jetën private të tij dalin në pah sjellje që prej kohësh po e dëmtojnë rëndë profilin e tij moral. Kjo është faza e tretë: rënia e “arkëngjëllit” Bill drejt një humnerë morale.

Në sytë e publikut të gjerë, imazhi i filantropit shembet pas vitit 2020, kur dalin lajme për sjellje seksuale “të papërshtatshme” dhe për zemërimin e Melinda-s, e cila më pas do të kërkojë divorcin, i finalizuar në vitin 2022. Në fakt, alarmi kishte nisur që në vjeshtën e vitit 2019. Në gusht të atij viti, Epstein vdes në burg. Pak javë më vonë, New York Times publikon një hetim mbi marrëdhëniet e tij me Gates-in, ndërsa Wall Street Journal zbulon raste tradhtie bashkëshortore që nuk mbeten vetëm çështje private: Gates kishte tentuar disa herë të krijonte marrëdhënie intime me punonjëse të tij dhe, në disa raste, ia kishte dalë.

Në vitin 2019, bordi i Microsoft-it detyrohet të hapë një hetim të pavarur pas denoncimit të një lidhjeje të nisur në vitin 2000 mes Gates-it dhe një punonjëseje. Në pranverën e vitit 2020, Gates jep dorëheqjen nga bordi drejtues. Hetimi konfirmon se marrëdhënia ka ekzistuar dhe është mbyllur “miqësisht”, por dalin edhe episode të tjera: afrime ndaj punonjëseve që kishin shkaktuar frikë dhe siklet, disa që datonin që nga viti 1994. Nuk flitet për dhunë fizike apo sjellje hapur grabitqare, por Gates bënte afrime në çdo ambient: konferenca, kokteje, darka zyrtare.

Melinda ishte e zemëruar edhe sepse Bill refuzonte të shkarkonte Michael Larson-in, menaxherin e pasurisë familjare prej 30 vitesh, i akuzuar për dhunë seksuale. Ajo dyshonte se Larson kishte mbuluar sjelljet e bashkëshortit. Por mbi të gjitha, Melinda u trondit nga marrëdhëniet e Bill-it me Epstein-in, të cilin ajo e ka përshkruar si një njeri “të neveritshëm”. Si mund të bashkëpunonte kreu i një fondacioni që investon një miliard dollarë për fuqizimin e grave me një pedofil të dënuar?

Edhe pse Gates pretendonte se e njihte pak Epstein-in, doli se e kishte takuar disa herë që nga viti 2011, përfshirë vizita në shtëpinë e tij në Nju Jork, mbrëmje të gjata shoqërore dhe një udhëtim në Florida me avionin privat të Epstein-it. Ky i fundit tentoi të përfshinte Gates-in dhe JP Morgan në krijimin e një fondi filantropik me komision personal prej 30 milionë dollarësh. Gates refuzoi dhe marrëdhëniet u ndërprenë në fund të vitit 2014.

Figura kyçe mes tyre ishte Boris Nikolic, një mjek kroat i emigruar në SHBA, këshilltar shkencor i fondacionit Gates dhe mik i ngushtë i Epstein-it, aq sa ky e emëroi zëvendësekzekutor të testamentit të tij. Përmes tij, Epstein u përpoq të rifitonte kontaktet me Gates-in, duke kaluar më pas në kërcënime dhe shantazhe.

Në vitin 2023 del në dritë se Gates kishte pasur, që në vitin 2010, një lidhje me Mila Antonova-n, një ruse 20-vjeçare, specialiste IT dhe lojtare bridge-i. Epstein e kishte përdorur këtë informacion për ta shantazhuar Gates-in në vitin 2017. Sot, dokumenti i fundit me akuza për sëmundje veneriane dhe prostituta ruse rihap plagët. Një tjetër valë balte mbi figurën e Gates-it, ndërsa ai ndodhej në Melburn, duke ndjekur gjysmëfinalet e Australian Open, në shoqërinë e partneres së tij aktuale, Paula Hurd, e veja e ish-CEO-s së Oracle, Mark Hurd. Pyetja mbetet: a do të jetë kjo goditja e fundit?/ Corriere della Sera