Boçi: Pedagogët dhe mësuesit
me paga sipas vendeve të BE

TIRANË - Pagat e pedagogëve deri në 150 mijë lekë të reja, rritja me 50% e rrogave për mësuesit dhe rritja e buxhetit për arsimin me 5.2% të Prodhimit të Brendshëm Bruto, përbëjnë shtyllat e programit të Partisë Demokratike për Arsimin. Kreu i Departamentit për Arsimin në PD dhe njëherazi deputeti, Luçiano Boçi, u shpreh gjatë një interviste për “Shqiptarja.com” se platforma e demokratëve e hartuar në 6-të pika, synon të abrogojë ligjin “Rama” për arsimin e lartë, nga mënyra e financimit të universiteteve si dhe rritja e autonomisë së publikut. Gjithashtu, PD parashikon që baza e financimit të universiteteve të jetë performanca e tyre, por vlerësimi për këtë do të bëhet nga Agjenci autonome.