Bonusi i bebes, Manastirliu: Kanë përfituar 2.670 familje në Lezhë

LEZHË- Ministrja e Shëndetësisë, Ogerta Manastirliu ka bërë me dije se 2.670 familje në Lezhë kanë përfituar nga bonusi i bebes. Përmes një postimi në 'Facebook', Manastriliu ka publikuar fotot e veçanta te bebeve që kanë ardhur në jetë tek Materniteti i Lezhës.

"Si Dorina, Sonela dhe Lida, nënat e reja që sjellin në jetë fëmijët e tyre në Maternitetin e Ri të Lezhës, kanë të garantuar shërbim mjekësor të kualifikuar, në infrastrukturë të standardeve bashkëkohore. 2.670 familje që janë gëzuar me fëmijë në Lezhë kanë përfituar edhe nga programi universal i bonusit të bebes për çdo të porsalindur. Vijojmë pa u ndalur me investimet shëndetin e nënës dhe fëmijës, për ndërtimin e materniteteve të reja edhe në Kukës, Berat dhe Tiranë", shkruan Manastirliu.

Bonusi i bebes është një ndihmë që jepet nga janari i viti 2019 për të gjitha familjet që bëhen me fëmijë, pavarësisht statusit social-ekonomik. Bonusi përfitohet menjëherë nëse prindërit e regjistrojnë të porsalindurin në zyrën e posaçme, të hapur në çdo maternitet në vend dhe përfitohet në dy pjesë nëse prindërit zgjedhin ta regjistrojnë fëmijën e tyre më vonë.

Për fëmijët që lindin në spitale private, apo jashtë vendit, çeku i bebes lëshohet nga Ministria e Shëndetësisë pas regjistrimit të të porsalindurit në zyrat e gjendjes civile. Familjet përfitojnë 40.000 lekë për fëmijën e parë, 80.000 për fëmijën e dytë dhe 120.000 lekë për fëmijën e tretë.

SI.E./Shqiptarja.com

TAG:
• ogerta manastirliu
• ministria e shendetesise
• bonusi i bebeve