Më 11 mars të 2019 pas ngjarjeve të shëmtuara në stadiumin e Kamzës që solli edhe ndërprerjen e kampionatit, kryeministri Rama në një tryezë të përbashkët me FSHF-në, premtoi se do të kishte ndryshime në ligj për aktet e dhunës të shkaktuara në stadiume. Ndër të tjera binte në sy kërkesa me tre vite burg pë ata që godisnin arbitrat, apo zyrtarë të tjerë.
Të martën me datë 24 ndryshimet për dhunën në stadiume janë bërë realitet pasi janë botuar në Fletoren Zyrtare. Të gjitha vendimet do të hyjnë në fuqi me datë 8 tetor të 2019.
Vendimet e botuara në Fletoren Zyrtare
“Neni 274/a
Goditja e sportistit, trajnerit, arbitrit, ndërmjetësit sportiv
Goditja ose vepra të tjera dhune ndaj sportistit, trajnerit, arbitrit, ndërmjetësit sportiv, për shkak të veprimtarisë sportive, nga persona jashtë kësaj veprimtarie, dënohet me burgim nga një deri në tre vjet. Po kjo vepër, kur kryhet në ambiente sportive, më shumë se një herë, apo është kryer nga drejtues apo anëtarë të klubeve sportive, dënohet me burgim nga një deri në pesë vjet.
Neni 274/b
Veprime të dhunshme në aktivitetet sportive
Hyrja në fushën e lojës, gjatë kohës së zhvillimit të aktivitetit sportiv, nga persona të paautorizuar, përbën kundërvajtje penale dhe dënohet me gjobë nga 50 000 deri në 100 000 lekë. Kur nga kjo vepër ka ardhur pengimi i zhvillimit normal të aktivitetit sportiv, dënohet me gjobë ose me burgim deri në tre muaj. Hedhja e sendeve të forta në fushën e lojës ose mbi masën e njerëzve, mbajtja apo përdorimi i lëndëve piroteknike, fishekzjarreve, flakadanëve, gjatë zhvillimit të një aktiviteti sportiv, dënohen me burgim nga gjashtë muaj deri në tre vjet.”.
Komente
Ju lumte Vandalet dhe Huliganet nun kane vend ne Stadiume
Përgjigju