Braçe: Zgjedhja e Metës President
pjesë e marrëveshjes së 2013-ës

Erion Braçe ka zbardhur për herë të parë faktin se zgjedhja e Ilir Metës President, ishte pjesë e marrëveshjes së prillit 2013 mes PS dhe LSI. 

I ftuar në "45 minuta" nga Denis Minga në Report Tv, Braçe u shpreh se pakti i para 4 viteve që çoi në bashkimin e të majtës dhe pajtimin e Ramës e Metës, parashikonte zgjedhjen e ish-kreut të LSI, si pasues të Bujar Nishanit në Presidencë. 

"Në këtë marrëdhënie ka vetëm një pale jo korrekte, nuk është PS. Pala korrekte është pikërisht PS-ja. I ka qëndruar korrekte marrëveshjes së prillit 2013 dhe marrëveshjes së presidentit. Ka qenë pjesë e marrëveshjes zgjedhja e Ilir Metës President. I kemi qëndruar korrekt deri në votën e fundit, ashtu si çdo pjese të marrëveshjes së prillit 2013.

I kemi qëndruar me korrektësi maksimale.

Në sallën e Kuvendit kemi treguar përgjegjshmëri maksimale. Jemi sjellë në mënyrë korrekte jo vetëm atë në ditë në seancë, por edhe pas seancës.

Ndërkohë, Braçe nuk shmang kritikat ndaj Metës dhe LSI-së, se janë përgjegjës për prishjen e koalicionit me PS, krisje e cila sipas tij, nisi në korrik 2016. Gjithashtu, deputeti socialist i bëri thirrje presidentit të ardhshëm që të kërkojë ndjesë për sjelljen në fushatë, pasi sipas tij tejkaloi çdo cak Kushtetues. 

"Sjellja e presidentit të zgjedhur ka qenë thuajse në çdo parametër tej Kushtetutës së Republikës së Shqipërisë.

Menjëherë pas korrikut të vitit që shkoi. Ka pasur marrëdhënie tërësisht të njëanshme. PS kërkoi vullnetin e LSI për të hyrë në zgjedhje bashkërisht, por LSI në mënyrë publike talli deri në refuzim banal të çdo kërkese për të hyrë në zgjedhje bashkë", u shpreh Braçe.