Breshri dëmton rreth 20 hektarë me grurë në Korçë! Fermerët kërkojnë kompensim: Kam bërë shumë shpenzime, tani s’pres të marrë as 50 mijë lekë

Parcela të tëra me grurë janë rrafshuar nga stuhia në fshatin Turan të Korçës. Moti i keq me shi e breshër kanë sjellë dëme të mëdha në bujqësi e sidomos në kulturën e grurit.

Në fshatin Turan të njësisë Drenovë janë rreth 20 hektarë me grurë dhe elb të dëmtuara, ose ndryshe 35-40% e sipërfaqes totale të mbjellë me këtë kulturë.

“Janë thyer kallinjë, nuk bëhen më! Shiheni vete sa shumë është dëmtuar ka rënë në tokë afro 50%. Unë kam bërë shpenzime, i kam hedhur DAP, nitrat, ure, shumë shpenzime dhe tani nuk pres të marr as 50 mijë lek nga prodhimi i mbetur”, tha një fermer.

LEXO EDHE:
Radhë të gjata në pikën e kalimit kufitar të Qafë-Thanës, shkak bëhet sistemi

Fermerët, ndryshe nga institucionet thanë se asnjë specialist I bujqësisë nuk ka dalë në terren për evidentimin e dëmeve. Ata kërkojnë kompensim, duke theksuar edhe dëmet në kulturat të tjera bujqësore.

“Të gjitha të mbjellat i ka dëmtuar, por sidomos foraxheret e grurin. Ishte stuhi e madhe me breshër. Ne kërkojmë të vijnë specialistët e bujqësisë se s’kanë ardhur fare. Të evidentojnë dëmet dhe të na kompensojmë se ne këtë vit nuk presim të marrim prodhim”, thanë të tjerë fermerë.

Drejtoria e Bujqësisë tha se në gjithë njësinë e Drenovës janë kultivuar 500 hektarë me grurë, por dëmet e para raportohen vetëm në Turan në një sipërfaqe prej 20 hektarësh.

 

M.Q./KT/Shqiptarja.com

TAG:
• grure
• Korce
• bresher
• moti i keq
• fermer