Britania alarmohet për rritjen
e numrit të emigrantëve shqiptarë

“Kufijtë e hapur të BE lejojnë gangsterët të hynë në Britani” është titulli i të përditshmes Britanike “The Daily Express”, e cila i vë faj Bashkimit Europian, me hapjen e kufijve të saj, për rritjen e numrit të emigrantëve ilegalë shqiptarë që futen në Mbretërinë e Bashkuar.

E përditshmja “The Daily Express” është e njohur për qëndrimin e saj antiemigracion.

“Lejimi i udhëtimit të lirë nëpër Europë, vetëm me pasaportë, të Shqiptarëve ka bërë që numri i hyrjeve ilegale në Britani të kapi një rekord të ri” shkruan gazeta. “Marrëzia e heqjes së kufijve brenda Zonës Shengen tashmë duket sheshit. Përpara se vendeve të Evropës Lindore t’u hiqej regjimi i vizave në 2010-ën, zyrtarët britanikë të emigracionit kapnin mesatarisht në javë dy emigrantë shqiptarë të futur në mënyrë të paligjshme”.


Studimi i “Frontex”, Agjencia e Kufijve e BE-së, zbuloi se në të njëjtën periudhë, 3 350 shqiptarë janë dëbuar nga kufijtë e Bashkimit Evropian - shtatë herë më tepër se një vit më parë. Këto shifra u bënë publike një javë pasi BE-ja çeli bisedimet për liberalizimin e vizave me Kosovën.

Ekspertët tremben se kjo do të sjellë në Britaninë e Madhe një tjetër valë emigrantësh të paligjshëm dhe kriminelësh, të cilët do të përfitojnë nga kontrolli i dobët i kufijve.

“Kemi dhënë vazhdimisht paralajmërime për këtë efekt të liberalizimit të vizave. Këto shifra do të jenë vetëm maja e ajsbergut, pasi përfaqësojnë vetëm personat e kapur”, citon gazeta. ah/shqiptarja.com/