Bruksel, Rama-Tsipras: Zgjidhje
për problemet e trashëguara 

Në kuadër të Samitit të NATO-s në Bruksel, Kryeministri Edi Rama pati një takim me homologun grek Alexis Tsipras.
 
Dy Kryeministrat nënvizuan natyrën dhe rëndësinë strategjike të  marrëdhënieve shqiptaro-greke dhe rolin e miqësisë mes të dy popujve si urë paqeje e stabiliteti ne mbarëvajtjen e integrimit euro-atlantik të rajonit.
 
Në takim morën pjesë dhe dy Ministrat e Jashtëm Bushati dhe Kotzias, ndërsa në qendër të tij ishin problemat e vjetra mes dy vendeve si kufiri detar, çështja Çame dhe ligji i Luftës.
 
Kryeministrat shprehën mbështetjen e tyre ndaj iniciativës së dy Ministrave të Jashtëm për një mekanizëm konsultimesh intensive me qëllim gjetjen e zgjidhjeve për problematikat e trashëguara nga e kaluara si dhe për nxitjen e mëtejshme të këtyre marrëdhënieve.
 
Palët nënvizuan rolin e posaçëm të komunitetit shqiptar në Greqi, si dhe vlerësuan hapat e rëndësishme të ndërmarra për integrimin social dhe ekonomik të shqiptarëve në Greqi.
 
Rama: Zgjidhja bazuar te praktikat ndërkombëtare
Kryeministri Rama theksoi nevojën e përparimit drejt gjetjes së zgjidhjeve për mosmarrëveshjet ekzistuese midis dy vendeve, në respekt të praktikave më të mira europiane dhe të së drejtës ndërkombëtare, referuar kufirit detar mes dy vendeve, pas rrëzimit nga gjykata Kushtetuese të marrëveshjes që firmosi Basha në kohën që ishte ministër i Jashtëm, por edhe çështjeve të tjera. 
 
"Greqia na ka mbështetur dhe dëshirojmë që të vijojë të jetë një mbështetëse e fortë në procesin e anëtarësimit të Shqipërisë në BE" tha zoti Rama.
 
Rama- Tsipras: Larg nga retorikat konfliktuale
Kryeministri Tsipras shprehu mbështetjen e fortë të Greqisë ndaj reformave shtet-konsoliduese në Shqipëri si dhe rëndësinë që ai i kushton respektimit të të drejtave të pakicës greke në vendin tonë.
 
Palët ranë dakord se vetëm gjetja e zgjidhjeve konkrete me impakt të drejtpërdrejtë në rritjen e mirëqenies së të dy popujve do të forcojë mirëbesimin midis dy shteteve dhe do të na largojë nga retorikat konfliktuale e ngërçet e së shkuarës.

[gallery]22444[/gallery]


Takimi Rama-Tsipras

dy.b/shqiptarja.com