BSH, Topi dekreton Fullanin
Rama kundër: 100% e gabua

TIRANE- Presidenti i Republikës Bamir Topi i propozon Kuvendit riemërimin e Ardian Fullanit si Guvernator të Bankës së Shqipërisë, për një tjetër mandat 7 vjecar.  Dekreti në mbështetje të nenit 93 dhe 161, paragrafi 2, të Kushtetutës së Shqipërisë, mban nr 7149 dhe datën e sotme 09.11.2011. Dekreti i emërimit i kalon Kuvendit për votim.

Kandidatura e Ardian Fullanit u propozua nga qeveria, së bashku me Elizabeta Gjonin dhe Petraq Milon si anëtarë të Këshillit Mbikëqyrës të Bankës qendrore.

REAGON RAMA
Partia Socialiste shprehet kundër  riemërimit të Fullanit në postin e Guvernatorit të Bankës së Shqipërisë. Nëpërmjet një njoftimi për shtyp Rama shpreh keqardhjen për kandidaturën e zgjedhur nga presidenti dhe nënvizon se është kandidatura 100%  e gabuar dhe PS do të votojë kundër.
 
"Mora dijeni me keqardhje për kandidaturën e zgjedhur nga Presidenti i Republikës për Guvernator i Bankës së Shqipërisë. Në këndvështrimin e Partisë Socialiste nuk është kandidaturë e gabuar, është kandidatura më e gabuar. Mundësia e një mandati të dytë për zotin Fullani, është pamundësi për të riparuar dëmet e konsiderueshme të mandatit të tij të parë. Për interesin e financave kombëtare dhe të popullit shqiptar, uroj që rrjedha e rrezikshme ku kanë hyrë punët me financat e këtij populli të ndalet një orë e më parë. E kështu as Presidenti Topi bashkë me votuesit e mundshëm në Kuvend të kësaj kandidature 100% të gabuar, të mos kenë asnjë arsye të pendohen për këtë zgjedhje nga mënyra si mund të precipitojnë gjërat edhe për shkak të drejtimit e politizuar dhe të papërgjegjshëm të Bankës së Shqipërisë. Partia Socialiste do të votojë kundër kësaj kandidature."- reagon Rama. 

ANETARET
Sipas nenit 44 të ligjit mbi Bankën e Shqipërisë, “të gjithë anëtarët e Këshillit Mbikëqyrës zgjidhen dhe emërohen nga Kuvendi, mbështetur në propozimet e bëra si më poshtë: a) Pesë anëtarë propozohen nga Kuvendi; b) tre anëtarë propozohen nga Këshilli i Ministrave; c) një anëtar propozohet nga Këshilli Mbikëqyrës. Presidenti i Republikës emëron guvernatorin e Bankës së Shqipërisë, mbështetur në propozimin e Kryetarit të Këshillit të Ministrave. Këshilli Mbikëqyrës i Bankës së Shqipërisë zgjedh dhe emëron zëvendësguvernatorët, mbështetur në propozimin e bërë nga guvernatori”.

Nga Këshilli aktual, mbeten për të përfunduar mandatin e dhënë nga Parlamenti vetëm tre anëtarë: Limos Malaj, Halit Xhafa dhe Arjan Kadareja. Dy të fundit janë të emëruar gjatë periudhës së mazhorancës aktuale dhe të propozuar nga ajo. Ndërkohë, veç kandidaturave qeveritare, si parti, PD dhe LSI kanë propozuar nga një kandidat. Dhori Kule, rektori aktual i Universitetit të Tiranës, ishte kandidatura e propozuar nga grupi parlamentar i Partisë Demokratike, ndërsa Elivar Golemi u propozua nga Lëvizja Socialiste për Integrim. Ermelinda Meksi nga PS.

(s.g/shqiptarja.com)