Bukuresht, Edi Rama: Viti 2014 e
gjen Ballkanin në paqe të plotë

BUKURESHT - Kryeministri Edi Rama ka marrë pjesë në takimin e krerëve të qeverive të Europës Qendrore dhe Juglindore dhe Kryeministrit të Republikës Popullore të Kinës që u zhvillua në Bukuresht. Në këtë takim ishin të pranishëm edhe Kryeministri i Rumanisë, Bullgarisë, Kroacisë, Çekisë, Estonisë, Hungarisë, Lituanisë, Maqedonisë, Malit të Zi, Polonisë, Serbisë, Sllovakisë, Sllovenise dhe Kryetari i Këshillit të Ministrave të Bosnjës dhe Hercegovinës.
 
Në këtë takim, u bisedua për rëndësinë e bashkëpunimit mes vendeve të Europës Qendrore dhe Juglindore dhe Kines, duke u përqendruar kryesisht në fushat e ekonomisë dhe tregtisë. Përfaqësuesit e vendeve pjesëmarrëse theksuan se ky bashkëpunim merr shkas nga partneriteti strategjik mes Bashkimit Evropian dhe Kinës dhe u shprehën të gatshëm për ta forcuar edhe më tej këtë bashkëpunim duke zhvilluar mbledhje të përvitshme të krerëve të qeverive dhe duke promovuar investime në ekonomi dhe tregti.
 
Gjatë fjalës së tij, Kryeministri Rama theksoi rëndësinë që viti 2014, ka për rajonin, si i pari vit që e gjen Ballkanin në paqe të plotë. Kryeministri Rama tha se ky moment i ri duhet shfrytëzuar për të bashkëpunuar sa më ngushtë me vendet e Evropës Qendrore dhe Juglindore për të nxitur investime rajonale, sidomos në fushën e transportit dhe energjisë.
 
Në këtë takim Kryeministri Rama shoqërohej nga Zëvendëskryeministri Niko Peleshi, Ministri i Bashkëpunimit Ekonomik Arben Ahmetaj, si edhe deputeti Taulant Balla. Gjatë ditës së sotme Kryeministri Rama do të zhvillojë një sërë takimesh bilaterale.
 
Redaksia online
(ac/shqiptarja.com)