Dy persona kanë rënë në prangat e policisë së Dibrës. Njëri prej të arrestuarve është një 34-vjeçar i cili merrej me shpërndarjen kanabisit në doza.

Gjatë kontrollit të kryer në një lokal ku ndodhej 34-vjeçari, uniformat blu gjetën kanabis gati për shitje.

Kryesisht ai e shiste lëndën narkotike në qytetin e Bulqizës.

“Specialistët e Seksionit për Hetimin e Narkotikëve në DVP Dibër, në bashkëpunim me shërbimet e Komisariatit të Policisë Bulqizë, bazuar në informacionet e siguruara në rrugë operative dhe kontrollet e vazhdueshme me fokus goditjen e paligjshmërisë në fushën e narkotikëve, arrestuan në flagrancë shtetasin S. D., 34 vjeç, banues në fshatin Dushaj.

Gjatë kontrollit të ushtruar në ambientet e një lokali në të cilin ndodhej ky shtetas, dhe më pas gjatë kontrollit fizik, iu gjet dhe iu sekuestrua në cilësinë e provës materiale një sasi me lëndë të dyshuar narkotike kanabis sativa, gati për shitje. Nga hetimet e kryera dyshohet se ky shtetas, pasi siguronte lëndën narkotike, e ndante në doza dhe më pas e shiste në qytetin e Bulqizës”, njoftoi sot policia.

Ndërkohë në pranga ka rënë edhe një 49-vjeçar i cili ishte në kërkim për veprën penale “Kultivimi i bimëve narkotike”, kryer në bashkëpunim.

Ai dyshohet se është bashkëautor me djalin e tij (i arrestuar më parë), i kultivimit të 1800 fidanëve dhe bimëve narkotike në fshatin Okshtun të Bulqizës, të goditur nga Policia, në qershor të këtij viti.

“Shërbimet e Komisariatit të Policisë Bulqizë, në bazë të informacioneve të siguruara në rrugë operative për vendndodhjen e një shtetasi në kërkim, kanë organizuar punën, ku në bashkëpunim me shërbimet e Komisariatit të Policisë Krujë, është lokalizuar në Krujë dhe është vënë në pranga shtetasi A. K., 49 vjeç, banues në Fushë-Krujë.

Gjykata e Dibrës ka caktuar ndaj 49-vjeçarit masën e sigurisë “Arrest në burg” për veprën penale “Kultivimi i bimëve narkotike”, kryer në bashkëpunim. Ky shtetas dyshohet se është bashkëautor me djalin e tij (i arrestuar më parë), i kultivimit të 1800 fidanëve dhe bimëve narkotike në fshatin Okshtun të Bulqizës, të evidentuar dhe goditur nga Policia, më 10 qershor 2025”, thuhet më tej në njoftim.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.