Buna, Ana e Malit rrezikon sërish
përmbytjen, asnjë investim
VIDEO- Flasin drejtuesit vendore

SHKODER - Ka kaluar më shumë se një vit nga përmbytjet masive që përfshinë zonën fushore të Nënshkodrës por frika e përsëritjes vazhdon të jetë e pranishme dhe këto ditë.

Rritja e nivelit të lumit  Buna ka kthyer dhe frikën e përmbytjeve tek banorët e komunës Ana e Malit, e cila ishte më e dëmtuara nga përmbytjet e fund dhjetorit 2010, fillim janarit 2011. Lumi Buna me një gjatësi prej 40 km përshkohet përmes komuna Dajc, Bërdicë, Velipojë dhe Ana e Malit.

Për specialistët e ujrave komuna e Ana e Malit është zonë ekspansioni në rast se rritet niveli i ujit të lumit Buna, çka do të thotë se si vitin e kaluar zona është më e rrezikuara nga përmbytjet.

"Në komunën Ana e Malit do të ketë probleme, sepse në brigjet e Bunës ku përfshin komuna Ana e Malit, nuk është bërë asnjë lloj investimi. Sikur të ketë një javë reshje, do të ishte problem, sepse dhe mbrotja e komunës së Dajçit ka ndikuar për keq për fushën e komunës Ana e Malit sidomos në fshatin Obot."- raportojnë drejtuesit vendorë për Zërin e Amerikes.

Gjatë këtij viti në zonën e Nën-Shkodrës u investuan rreth 10 milion dollarë për riaftesimin e sistemit mbrojtës të argjinaturave, por komuna e Anës së Malit mbeti jashtë këtyre investimeve.
Drejtuesit vendorë thonë se investimet për këtë zonë do të jenë vetëm këtë vit.

“Shqetësimet e banorëve vazhdojnë sepse nga përmbytja e madhe, të gjitha tokat janë nxjerrë dhe nuk janë punuar asnjë. Përmbytja ka lënë pasoja të mëdha dhe frika se mos përmbyten prapë, dhe e tërë fusha është e papunuar. Kemi bërë kërkesa dhe na janë kthyer përgjigje se kanë ardhur 111 milionë lekë të reja nga ministria e Bujqësisë që do të investohet këtë vit. Më shumë investimet do të bëhen në argjinaturë, pasi ka pasur shumë erozion. “
(sg/shqiptarja.com)