Burri dhunon gruan shtatzënë
kërcënon se do djegë shtëpinë

 DURRES - Vrasjet dhe dhuna brenda familjes në vendin tonë është bërë si një lojë ping-pongu, ku një herë godasin burrat dhe një herë godasin gratë.  Dje duket se e kanë pasur rradhën burrat. Kur Asllan Hoxha 37 vjeç ka dhunuar gruan e tij, Enkeleda Hoxha pesëmuajshe shtatzënë. Burri e ka dhunuar gruan e tij në sy të fëmijës së tyre 15 muajsh. Ngjarja e rëndë ndodhi mesditën e djeshme rreth orës 12:00 në banesën e familjes Hoxha në lagjen numër 9 të qytetit bregdetar të Durrësit.

Ndërkohë që Enkeleda Hoxha, gruaja e dhunuar, ka telefonuar policinë në numrin 129, për të denoncuar dhunën që bashkëshorti kishte ushtruar  ndaj saj. 37-vjeçari pasi ka dhunuar gruan e tij shtatzënë e ka spërkatur me lëndë djegëse. Menjëherë pasi policia e qytetit të Durrësit  ka marrë telefonatën, është nisur në vendin e ngjarjes, ku ka gjetur 37-vjeçarin, duke mbajtur në dorë një çakmak, me të cilin kishte kërcënuar se do t’i vinte zjarrin banesës.

Enkeleda Hoxha ka mundur të njoftojë policinë, duke shmangur kështu tragjedinë. Policia ka mundur të arrestojë menjëherë në flagrancë bashkëshortin dhunues, teksa ai kërcënonte se do të digjte gruan shtatzënë bashkë me fëmijën e tij. Nga hetimet paraprake dyshohet se ngjarja  e rëndë të ketë pasur motiv xhelozinë. Ndërkohë, mësohet se gruaja shtatzënë ka denoncuar disa herë në polici dhunën e bashkëshortit e cila  dje mund të rezultonte fatale.

Gruaja shtatzënë nuk është paraqitur as në urgjencën e spitalit, as në atë të maternitetit, pasi nuk ka patur dëmtime që mund t’i rrezikonin jetën asaj dhe foshnjës. Gjendja e saj shëndetësore është e qëndrueshme, përpos traumës së pësuar për shkak të dhunës. Dhuna dhe krimi brenda familjes është bërë një fenomen shqetësues për shoqërinë shqiptarë. Vetëm dhjetëditëshin e fundit në vendin tonë kanë humbur jëtën tre gra si pasojë e krimit në familje.

Ndërsa  dy ditë më parë një grua ka plagosur me thikë pas shpine bashkëshortin e saj. Dhe jo më larg se mbrëmjen e të enjtes një grua ka vrarë fqinjin e saj për shkak të një borxhi. Nga dhuna në familje ato që janë më të prekura janë femrat, pasi vetëm për këtë vit janë vrarë 9 femra si pasojë e krimit brends familjes. Vetëm  për vitin 2013, deri më tani janë plot 400 gra që i janë drejtuar Gjykatës së Tiranës dhe kërkojnë urdhra mbrojtje nga burrat e tyre.

Lajmi u përditësua

Shkrimi u botua sot në gazetën Shqiptarja.com (print) 21.07.2013
 
Redaksi Online
(b.m/shqiptarja.com)