Bushati në takimin e CEI:
Siguria e Ballkanit e ndërvaru

OHËR - Ministri i Punëve të Jashtme të Republikës së Shqipërisë, Ditmir  Bushati, mori pjesë në takimin e Ministrave të Punëve të Jashtme të shteteve anëtare të Nismës për Evropën Qendrore (CEI), të zhvilluar në Ohër në kuadër të Kryesisë Maqedonase të kësaj nisme. Në fjalën e mbajtur në këtë takim, Bushati u shpreh se, Maqedonia duhet të adresojë siç duhet krizën politikë.

“Siguria e secilit vend është e ndërvarur nga siguria kolektive e rajonit dhe në këtë kontekst i shërben interesit tonë kolektiv që Maqedonia të adresojë siç duhet krizën aktuale politike. Shqipëria mbetet e vendosur që të mbështesë integrimin euro-atlantik të Maqedonisë, i cili kalon nëpërmjet zbatimit të plotë të Marrëveshjes së Ohrit, në frymë dhe në germë, si dhe respektimit të të drejtave të shqiptarëve, si një faktor shtet ndërtues në Maqedoni", tha Bushati.

Në këtë takim morën pjese Ministra dhe përfaqësues nga 18 vendet anëtare të CEI-t, të cilët  shkëmbyen pikëpamje mbi zhvillimet e fundit në rajon, në veçanti mbi procesin e Integrimit Evropian, konektivitetin, sigurinë dhe stabilitetin në rajon, si dhe mbi rolin e kësaj nisme, qoftë ai aktual apo në të ardhmen, bazuar në Planin e Veprimit të CEI-t për vitet 2014-2016 si dhe në vazhdimësi. 

Gjatë qëndrimit në Ohër, Ministri Bushati zhvilloi  një takim me Kryetarin e BDI-së, Ali Ahmeti, dhe me përfaqësues të shoqërisë civile. Gjatë takimeve u diskutua mbi zhvillimet politike më të fundit në Maqedoni, në vijim të bisedimeve që po zhvillohen me ndërmjetësimin e BE–së, mbi hapat që po ndërmerren për zgjidhjen e krizës politike, nevojën e avancimit të të drejtave të shqiptarëve në Maqedoni dhe rëndësinë e zhvillimeve në Kumanovë, duke u ndalur tek nevoja për të pasur një hetim transparent e të plotë.

Redaksia Online
(f.s/shqiptarja.com)