Debate të forta ka pasur te komisioni parlamentar i Ligjeve dhe ai i Ekonomisë, ku po diskutohej projektbuxheti i vitit të ardhshëm. Deputetët e PD kanë akuzuar qeverinë si të inkriminuar, duke iu referuar çështjes së ish-ministritë të Brendshëm, Saimir Tahiri, në hetim.
VIDEO/ Anëtarët e Partisë Demokratike kanë braktisur komisionin e ligjeve pas debateve të forta me anëtarët e mazhorancës
Shkak i debateve mes palëve është bërë krimi, ku deputeti i djathtë, Gent Strazimiri, ka deklaruar se në korridoret e Kuvendit sillet një i inkriminuar, që mbrohet nga socialistët, teksa e ka pasur fjalën për deputetin Saimir Tahiri, i cili akuzohet për përfshirje në trafikun ndërkombëtar të drogës.
Strazimiri: Ju harroni qe korridoreve te Kuvendit sillet nje i inkriminuar. Keni qene te pergatitur ta mbronit. Ketu eshte tempull per njerez te ndershem. Jo strehim per te kerkuarit e drejtesise me prova te antimafias italiane. Ju po e mbroni mafian ne kurriz te shtetit. Z. Kryetar, portret krenar, ballehapur siç ju ka thene partia. Ulsi, aty nuk je ulur per te mbrojt kriminelet.
Manja: Ule gishtin, ule
Fino: Ishte me mire Halimi dje. E uli nivelin Strazimiri
Manja: PD e beri ritualin. Ketu duhen njerez te pergjegjshem
Manja: Drejtesia po ben punen e vete. Nuk kam pse skuqem. Jemi garante te Kushtetutes dhe ligjit.
Debate te 'Ekonomia', PD: TVSH e biznesit të vogël në Kushtetuese
Pas komisionit të Ligjeve, debate ka pasur edhe te komisioni parlamentar i Ekonomisë dhe Financave për shkak të çështjes "Tahiri", gjatë diskutimit të projektbuxhetit të vitit 2018. Deputetët e PD u larguan nga mbledhja pas debateve, ndërsa LSI preferoi të qëndrojë njësoj si te 'Ligjet'. Kreu i grupit parlamentar demokrat, Edmond Spaho akuzoi qeverinë si të inkriminuar. "Turp për ju që nuk hoqët imunitetin e Saimir Tahirit", tha Edmond Spaho, anëtar i këtij Komisioni, që drejtohet nga socialisti Erion Braçe.
Jorida Tabaku ngriti shqetësimin se buxheti i vitit të ardhshëm ka rreziqe të mëdha fiskale. Ajo paralajmëroi edhe ankimimin e buxhetit në Gjykatën Kushtetuese nëse miratohet me këto parametra, duke përfshirë biznesin e vogël në skemën e TVSH-së. “Koncesionet rriten 30 %. Ky projektbuxhet ka rreziqe të mëdha fiskale. Ju s’keni përgjegjshmëri. Vini këtu e talleni me hashashin dhe drogën. Po fshihni shifrat e borxhi publik. Opozita do të vijojë betejën me Gjykatën Kushtetuese nëse ky buxhet miratohet kështu”, u shpreh Tabaku.
“Diskutojmë prej kohësh kohë për TVSH-në që do të vendoset pragu, pse qeveria i heq të drejtën parlamentin për të vendosur pragun e TVSH-së dhe ia jep këtë të drejtë qeverisë? Partia Demokratike do ta çojë në Gjykatë Kushtetuese në rast se ky parlament do t’i japë atribute qeverisë që nuk i takojnë" - tha Jorida Tabaku gjatë diskutimit në Komisionin e Ekonomisë.
"Edhe FMN-ja e ka kundërshtuar dhe nuk do të sjellë asnjë përfitim pasi do të ketë kosto shtesë mbi administratën dhe nuk do të keni mundësi që ta mblidhni" - shtoi deputetja Tabaku. Nga ana e tij, kreu i komisionit të Ekonomisë, Erion Braçe tha se deputetët e PD po bëjnë propagandë. “Ky komision nuk ka vend për propagandë”, tha ai.
Por për të dytën ditë radhazi, Edmond Spaho, kryetar i grupit parlamentar demokrat akuzoi maxhorancën se mori në mbrojtje ish-ministrin Tahiri. “Për këtë reformën e Sajmir Tahirit e keni fjalën? Pse nuk ju vjen turp. S’i hoqët imunitetin. T’ju vijë turp që përmendni reformën në drejtësi. Jeni të zhytur në drogë. Qesharake. Druri i shtrembër ju kërcënoi”, tha Spaho. Braçe iu përgjigj që të qetësohej dhe të lexonte raportin e “Doing Business”. “Më vjen keq që jeni i nxehur. Lexoni “Doing Business”.
Pas këtyre debateve deputetët e PD lanë mbledhjen e Komisionit ashtu si edhe një ditë më parë. I pranishëm nga LSI ishte vetëm deputeti Edmond Haxhinasto i cili nuk iu bashkua bojkotit të PD.
d.c./shqiptarja.com