Bllokimi në trafik është tmerr për të gjithë ata që i duhet të qëndrojnë me orë të tëra në automjet, e veçanërisht në mes të vapës, por kjo nuk justifikon sjelljen e gabuar, të disa shoferëve. Me një mungesë të edukatës të respektimit të rregullave të qarkullimit rrugor, në mes të trafikut gjen shoferë që bëjnë parakalime të gabuara, krijojnë 3 korsi aty ku janë vetëm 2, duke u bërë burim aksidentesh, e duke bllokuar edhe më keq trafikun për ata që presin në radhë.

Këta shoferë evidentohen edhe në pasojat që mund të kenë sjellë veprimet e tyre në rrugë: Disa aksidente të njëpasnjëshme.

Gjatë të dielës kur shumë qytetarë që kishin pushuar në bregdetin shqiptar u bllokuan në trafik, veçanërisht ata që ktheheshin nga Shëngjini, policia rrugore ka ndaluar disa shoferë të papërgjegjshëm në qytete të ndryshme.

Në Lezhë një 59-vjecar humbi drejtimin e makinës dhe u përplas me një motor që drejtohej nga një 34-vjeçar me banim në Tiranë. Për pasojë u dëmtua pasagjerja në motor.

Po në Lezhë një 21-vjeçar humbi kontrollin e drejtimit të makinës dhe u përplas me 2 automjete, njëri drejtohej nga një 54-vjeçar nga Kosova dhe tjetri nga një grua 50-vjeçrare. 2 pasagjerë në makinën me targa të Kosovës morën dëmtime të lehta.

Edhe një 21-vjeçare banuese në fshatin Mjedë po hetohet në gjendje të lirë, pasi në aksin Shkodër-Lezhë, makina që ajo drejtonte u përplas me një automjet tjetër.

Në Elbasan një 28-vjeçar po hetohet në gjendje të lirë, pasi në aksin Elbasan-Librazhd u përplas me 2 automjete të tjera, njëri drejtohej nga një 80-vjeçar e tjetri nga një i ri. Për pasojë, mbetën të dëmtuar lehtë, i moshuari, shoferi 31-vjeçar dhe 4 pasagjerë në automjetin e tij. Nga përplasja u dëmtuan edhe ambientet e një lokali.

Në Korçë 2 shoferë, njëri me banim në Tiranë e tjetri në Pogradec u arrestuan pasi drejtonin makinën në gjendje të dehur. E njëjta gjë edhe në Shkodër, ku u arrestua një 40-vjeçar. Në Vlorë u arrestua një 40-vjeçar, ndërsa në Sarandë efektivët vunë në pranga një 33-vjeçar me banim në Napoli, për drejtim të makinës në gjendje të dehur.