“Roli i shqiptarëve është i patjetërsueshëm në mbështetje të proceseve euroatlantike në Ballkanin Perëndimor! Sidoqoftë, procesi i integrimeve euroatlantike nuk zëvendëson domosdoshmërinë e thellimit të bashkëpunimit mbarëkombëtar!”- u shpreh Ministri Cakaj për sa i përket Konferencës të zhvilluar në Tiranë me temë: “Roli i Shqipërisë në promovimin e interesave kombëtare të shqiptarëve në hapësirën e Ballkanit Perëndimor”.
Kjo konferencë, e konceptuar si një tryezë pune, mblodhi të gjithë përfaqësuesit e lartë politikë shqiptarë nga rajoni, si Ministrin e Jashtëm të Republikës së Kosovës, Behgjet Pacollin, Nënkryetarin e Parlamentit të Malit të Zi, Genc Nimanbegu, Kryetarin e Komunës së Preshevës, Shqiprim Arifi, e shumë të tjerë.
Ndër të tjera Cakaj, nënvijëzoi veçanërisht rëndësinë e bashkërendimit të plotë të politikës së jashtme mes Republikës së Kosovës dhe Republikës së Shqipërisë. Thellimi i marrëdhënieve brenda shqiptarëve sipas Cakaj, është sa detyrë kombëtare e historike aq edhe interes politik e strategjik.
Qëllimi kryesor i konferencës ishte krijimi i platformave të përbashkëta të veprimit dhe bashkërendimi i qëndrimeve politike në shërbim të afirmimit të të drejtave kombëtare. Përfaqësuesit politikë shqiptarë në rajon përshëndetën dhe vlerësuan nismën e kreut të diplomacisë shqiptare për t’i mbledhur në një tryezë të përbashkët.