Cameron në Prishtinë: Britania mbështetëse e madhe e së drejtës së Kosovës për t’u njohur nga të tjerët! Me rëndësi stabiliteti në rajon

Kryetari i Partisë Demokratike, Lulzim Basha falënderoi sot përmes një mesazhi në rrjetet sociale ish-kryeministrin britanik, David Cameron për vizitën në Kosovë. Ai e ka cilësuar këtë vizitë domethënëse.

“Falemnderit David Cameron për vizitën domethënëse të nisjes së vitit në Republikën e Kosovës dhe për mesazhet e qarta në mbështetje të paqes, stabilitetit dhe vlerave euroatlantike për Kosovën dhe të gjithë rajonin. Mirënjohës për rolin vital që Mbretëria e Bashkuar luan së bashku me NATO-n për të garantuar paqen dhe stabilitetin në Ballkanin Perëndimor dhe investimin në një të ardhme më të mirë për të gjithë popujt tanë. Shqiptarët janë të privilegjuar të qëndrojnë krah një mikeje dhe aleateje si Mbretëria e Bashkuar”, shkroi Basha në rrjetet sociale.

Ministri i Jashtëm britanik, David Cameron gjatë vizitës në Prishtinë ka takuar edhe trupat e Mbretërisë së Bashkuar që ndodhen në Kosovë në kuadër të misionit të NATO-s.

Ai tha se Mbretëria e Bashkuar e di se po ndihmon në atë që është e drejtë dhe po luan një rol jetin në ruajtjen e stabilitetit në Ballkanin Perëndimor për të shmangur shfaqjen e konflikteve të së shkuarës.

“Britania po ndihmon me të gjitha ato gjëra dhe është e drejtë që ne e bëjmë. Stabiliteti në Ballkan, siguria në Ballkan, ndalimi i atyre që duan të krijojnë stabilitet dhe të krijojnë probleme, ky është një interes i drejtpërdrejtë kombëtar britanik dhe kjo është arsyeja pse unë jam këtu duke falënderuar trupat tona për punën që bëjnë. Duke punuar me qeverinë e Kosovës dhe duke i ndihmuar me agjendën e tyre dhe duke e njohur këtë është një vend i pavarur sovran që meriton mbështetjen tonë teksa ata përpiqen drejt sigurisë dhe suksesit. Mbretëria e Bashkuar është krenare për mbështetjen e saj të gjatë për sovranitetin dhe pavarësinë e Kosovës dhe ne po luajmë një rol jetik në ruajtjen e stabilitetit në Ballkanin Perëndimor për të siguruar që konfliktet e së kaluarës të mos ndizen edhe një herë”- tha Cameron teksa vizitoi trupat britanikë.

Presidentja e Kosovës, Vjosa Osmani ka pritur sot në takim Sekretarin e Jashtëm të Britanisë së Madhe, David Cameron. Sipas një njoftimi të presidencës, në takim është diskutuar për raportet mes dy vendeve.

Osmani, në takim raportohet se ka theksuar rëndësinë e anëtarësimit të Kosovës në NATO.

“Në takim u diskutua edhe për situatën e sigurisë në rajon dhe më gjerë, me atë rast Presidentja Osmani e informoi sekretarin Cameron edhe për përpjekjet e vazhdueshme destabilizuese të Serbisë, përfshirë aktin e agresionit dhe aktin terrorist kundër Republikës së Kosovës më 24 shtator", thuhet në njoftimin e presidencës.

Osmani gjithashtu ka folur edhe për grupet terroriste të mbështetura nga Beograd.

“Në këtë drejtim, Presidentja foli edhe për grupet terroriste, të mbështetura nga Beogradi, të cilat vazhdojnë të krijojnë frikë dhe intimidim brenda komunitetit serb. Pavarësisht kësaj, Presidentja Osmani theksoi se Kosova është shembull në rajon sa i përket të drejtave të komunitetit joshumicë, ndërsa riafirmoi përkushtimin e plotë të Kosovës për ta fuqizuar çdo qytetar, pa dallim",  thuhet në njoftimin e presidencës.

Alicia Kearns

Kryetarja e Komitetit për Punë të Jashtme në Parlamentin e Britanisë së Madhe, Alicia Kearns ka reaguar për mes një postimi në llogarinë e saj në "X" në lidhje me vizitën e ministrit të Jashtëm britanik, David Cameron në Kosovë.

Gjatë kësaj vizite Cameron është pritur nga kryeministri i Kosovës, Albin Kurti. Kearns ka shprehur kënaqësinë në lidhje me vizitën e Cameron në Kosovë. Ajo shtoi se Britania e Madhe ka një rol të rëndesishëm për të luajtur si një zë i pavarur dhe për të sfiduar mungesën e drejtësisë në Procesin e Berlinit. 

Postimi i plotë:

Më vjen mirë të shoh David Cameron sot në Kosovë. Britania e Madhe ka një rol të rëndësishëm për të luajtur si një zë i pavarur dhe për të sfiduar mungesën e drejtësisë në Procesin e Berlinit. Është koha që ne ta gjejmë forcën dhe zërin tonë për Kosovën dhe të qëndrojmë të palëkundur me ta kundër irredentizmit.