Irani nisi një javë ceremonish masive mortore për Ajatollahun Ali Khamenei, udhëheqësin suprem të Iranit, që vdiq në ditën e parë të sulmeve amerikano-izraelite në fillim të luftës. Mijëra vajtues, që mbanin flamuj të kuq - një simbol i lidhur me thirrjet për hakmarrje - u mblodhën në oborrin e Xhamisë së Madhe të Teheranit para mbërritjes së arkivolit të Khameneit, duke brohoritur "Vdekje Amerikës" dhe "Hakmarrje, hakmarrje".

Ceremonia përfaqëson fazën e parë të një programi shumëditor të përgatitur nga autoritetet qeveritare për funeralin dhe varrimin e Khamenei-t dhe disa anëtarëve të familjes së tij: dhëndrit të tij Mesbah ol Hoda Bagheri; vajzës së tij të madhe, Seyyedeh Boshra Hosseini Khamenei; gruas së tij, Zahra Haddad Adel; dhe mbesës së tij, Zahra Mohammadi Golpaygan.

Sipas autoriteteve iraniane, pas ceremonisë dhe lutjeve, funerali do të mbahet më 6 korrik. Shërbime të mëtejshme mortore do të mbahen të martën, më 7 korrik, në qytetin e shenjtë të Qom-it, dhe më 8 korrik, ata do të zhvendosen në Irak, në qytetet shiite të Naxhafit dhe Qerbelasë. Sipas transmetuesit iranian Press TV, kjo ditë u shtua "pas kërkesave të përsëritura nga fiset, studiuesit, elitat dhe figurat politike dhe fetare irakiane". Ditët e funeraleve do të përfundojnë me varrimin në Mashhad më 9 korrik.

Në ceremoninë e mëngjesit të djeshëm morën pjesë gjithashtu disa anëtarë të establishmentit politik dhe ushtarak të Iranit. Midis tyre ishte Ahmad Vahidi, kreu i Gardës Revolucionare (Pasdaran), i cili u shfaq në publik për herë të parë që nga fillimi i shkurtit, duke i bërë homazhe trupit të Khameneit. Prania e tij dëshmohet nga imazhet e transmetuara nga mediat shtetërore, të cilat e tregojnë atë duke u lutur me duart mbi arkivol. Sipas zëdhënësit të Ministrisë së Jashtme, Esmail Baghaei, priten afërsisht edhe 100 delegacione të huaja.

Udhëheqësi aktual Suprem, Mojtaba Khamenei, mungon, duke nxitur shqetësime për shëndetin e tij ose frikë për sigurinë e tij. Sipas Abdul Majid Hakimollahi, përfaqësuesit të Udhëheqësit Suprem në Indi, Mojtaba Khamenei nuk do të marrë pjesë në funeralin e babait të tij për arsye sigurie dhe për shkak të kërcënimeve nga Izraeli.

Që kur u emërua udhëheqës suprem në fillim të marsit, Khamenei nuk është shfaqur kurrë në publik dhe ua ka besuar mesazhet e tij në festat kombëtare teksteve të shkruara të publikuara në mediat shtetërore.