Çështja CEZ, Basha sulmon Kopaç
Bojëdalë e i përgënjeshtruar nga BE

Kreu i Partisë Demokratike, Lulzim Basha ka sulmuar Drejtorin e Sekretariatit të Komunitetit të Energjisë, Janez Kopaç.
 
Lideri i opozitës në një status të publikuar në Facebook, duke akuzuar Edi Ramën për aferën e CEZ tha se kreu i qeverisë u shfaq krenar krah kopaçeve bojëdalë”.
 
Sulmi i Bashës ndaj Kopaç vjen pasi ky i fundit në mbledhjen e 13-të të Këshillit të Ministrave të Komunitetit të Energjisë së mbajtur në Tiranë tha se zgjidhja e konflitit Shqipëri-CEZ me marrëveshje miqësore ishte zgjidhja e duhur.
 
Por, Basha duke bërë një lojë fjalësh e cilëson Kopaç person të përgënjeshtruar nga BE dhe qeveria çeke.
 
Kreu i PD-së më tej, akuzon kryeministrin Rama se po pengon hetimin ndërkombëtar për aferën CEZ pasi është i përfshirë me zgjidhjen e mosmarrëveshje në një kohë kur Avokatët e Shtetit i sugjeronin të vazhdonte çështjen në arbitrazh.
 
Statusi i plotë i Bashës:
 
Kryepërgjegjësi për vjedhjen e 600 milionëeurove u shfaq sot krenar për vjedhjen e shekullit. Në krah të kopaçeve bojëdalë e të përgënjeshtruar nga BE dhe nga qeveria çeke, Kryemashtruesi gënjeu prapë shqiptarët kur deklaroi se avokatët e qeverisë këshilluan tërheqjen nga arbitrazhi. E kundërta është fakt. I kërkuan të vazhdonte pa humbur kohë gjyqin. Por ai e kish ndarë mendjen t’i ndante 600 milionë euro të shqiptarëve me CEZ. Dhe për të humbur gjurmët ndaloi me ligj hetimin e vjedhjes së shekullit. Nëse nuk ka gjë për të fshehur pse pengon hetimin ndërkombëtar? Sepse është i zhytur deri në fyt në këtë aferë.

Kush është Kopaç?
Kopaç është politikan slloven, ku është zgjedhur deputet për herë të parë në vitin 1992. Gjatë karrierës së tij politike, ai ka mbajtur pozicionet e ministrit të Financave, Mjedisit si dhe ministër i Ekonomisë.
 
Aktualisht ai mban postin e Drejtorit të Sekretariatit të Komunitetit të Energjisë, e cila është një organizatë ndërkombëtare që merret me politikat e energjisë. Organizata është themeluar me traktat ndërkombëtar në tetor 2005 në Greqi dhe ka qendrën në Vjenë.


Redaksia Online
(f.s/shqiptarja.com)