Champions League/ Shanset e kualifikimit të barabarta, trajneri i Partizanit: Na duhet karakter, nesër ndeshje tjetër

BATE Borisov - Partizani është ndeshja e kthimit për turin e kualifikues të Champions League. Dueli do zhvillohet nesër (e martë) në 20:00, në stadiumin e Mezokovezd në Hungari, kjo pasi ekipet bjelloruse nuk mund t'i zhvillojnë përballjet në vend, pas dënimit nga UEFA për mbështetjen e agresionit rus në Ukrainë.

Ndeshja e parë mes tyre në "Air Albania" përfundoi 1-1, ndërsa dueli i së martës do luhet në një atmosferë të akullt, kjo pasi nuk do ketë tifozë në stadium.

Përpara ndeshjes në konferencën për mediat foli trajneri i Partizanit, Zoran Zekic. Kroati kërkoi më shumë karakter, në një ndeshje që mund të vendosë kalimin e turit.

Pas barazimit 1–1 në ndeshjen e parë, si e konsideroni ndeshjen e kthimit ndaj Bate Borisov?

E kam përmendur edhe në përfundim të ndeshjes së parë në Tiranë, që ky rezultat lë çdo gjë të hapur përsa i përket kualifikimit në raundin e dytë. Kemi luajtur vetëm aktin e parë. Nesër do të jetë një tjetër ndeshje, duhet të kemi përqendrim maksimal dhe të fokusohemi të bëjmë ndeshjen tonë.

Tashmë e njihni kundërshtarin, sa janë shanset e Partizanit për kualifikim?

E theksova edhe më parë që nesër do të jetë krejtësisht një ndeshje tjetër. Ne duhet të bëjmë një ndeshje dhe një paraqitje akoma edhe më të mirë. Duhet të kemi më shumë karakter, më shumë energji dhe më shumë disiplinë.

Si është gjendja fizike e skuadrës?

Kemi disa probleme të vogla, asgjë problematike. Sot kemi edhe seancën e fundit dhe shpresoj që çdo gjë të shkojë mirë. Nesër besoj i gjithë grupi do të jetë i gatshëm.

Ndeshja nesër do te luhet pa tifozë, si e komentoni këtë fakt?

Nuk mund ta ndryshojmë këtë gjë. Askush nuk e dëshiron që një ndeshje futbolli të luhet pa publik dhe për këtë më vjen shumë keq. Do të jetë një situatë e njëjtë si për ne ashtu edhe për Bate Borisov. Ne duhet të përgatitemi të luajmë edhe në situata të tilla.

G.MO/Shqiptarja.com

TAG:
• partizani
• uefa
• Zoran Zekiç