TIRANE- Në sytë e agjencisë amerikane të inteligjencës, CIA, Shqipëria është një vend me nivel mjaft të lartë informaliteti, me korrupsion endemik, me sistem të komplikuar taksash, ku kontratat nuk respektohen dhe me një klimë biznesi që lë për të dëshiruar duke penguar investimet e huaja.

Në prezantimin që i bën Shqipërisë në sitin e vet zyrtar, CIA thekson se pavarësisht hapave të hedhur gjatë viteve të tranzicionit Shqipëria mbetet një prej vendeve më të varfra në Evropë për shkak “të përmasave të mëdha të ekonomisë informale dhe infrastrukturës së dobët të sektorit të energjisë dhe të transportit”.