Covid, 285 viktima në Itali në 24 orët e fundit...Në botë rastet pozitive më shumë se 3 milionë! Koreja e Jugut për herë të parë zero infeksione

Sipas autoriteteve të Mbrojtjes Civile Italiane gjatë 24 orëve të fundit janë regjistruar  285 viktima nga koronavirusi, për një total prej 27967 vdekje që nga fillimi i epidemisë. 

Numri i përgjithshëm i të të shëruarve është rritur në më shumë se 75945 teksa vetëm sot u regjistruan  4693 të shëruar  

Autoritetet raportuan gjithashtu se sot u regjistruan edhe 1872raste të reja pozitiv me Covid. Numri total i të infektuarve është më 232463 mijë që nga fillimi i epidemisë.

Zyrtari i lartë i rajonit të Lombardisë Giulio Gallera tha për mediat italiane se Covid-19 po humbet forcën që pati në javët e para të shfaqjes së tij. Sipas Gallera, virusi tashmë është me pak agresiv në raport me periudhën e parë kur pati dyndje në spitalet e rajonit.

“Ndoshta fakti që ka më pak njerëz të infektuar ka zvogëluar vdekshmërinë dhe virulencën. Nuk është rastësi që njerëzit që mbërrijnë sot në spital nuk janë në kushte aq të rënda shëndetësore”.

Më shumë se 3.8 milionë amerikanë të papunë kanë kërkuar ndihmë nga autoritetet gjatë shtatë ditëve të fundit për shkak të krizës ekonomike, që vlerësohet të jetë më e rënda që nga viti 1930.

Numri i përgjithshëm i qytetarëve amerikanë që kanë kërkuar dëmshpërblim financiar që nga shpërthimi i pandemisë - gjashtë javë më parë - ka arritur në 30.3 milionë.

Kjo shifër, sipas agjencisë AP, është më shumë se popullsia e Nju Jorkut dhe Chicikagos me zonën përreth.

Ekspertët parashikojnë që shkalla e papunësisë mund të arrijë në 20 për qind në muajin prill.

Ekonomia amerikane u tkurr për 4,8 përqind në tremujorin e parë, dhe vlerësohet se mund të bjerë me një rekord prej 40 për qind në tremujorin e dytë (prill-qershor).

Ky nivel i rënies nuk ka ndodhur gjatë asnjë tremujori, që nga koha e pas Luftës së Dytë Botërore.

Shtetet e Bashkuara të Amerikës deri më tani kanë numrin më të lartë në botë të personave që kanë vdekur nga sëmundja COVID-19, që shkaktohet nga koronavirusi i ri. Numri i të infektuarve ka arritur në 1,040,488, ndërkaq, nga koronavirusi kanë humbur jetën 60,999 amerikanë.

Numri i vdekjeve nga Covid-19 gjatë 24 orëve të fundit në në Spanjë ra në 268, më i ulëti në gati gjashtë javë, tha ministria e shëndetësisë.

Numri total i rasteve në vend ka shkuar 236,899 prej të cilëve 24,275 kanë ndërruar jetë, numri i katërt më i lartë në botë.

Megjithatë Spanja ka arritur të shërojë pjesën më të madhe të pacientëve të saj. 132,929 persona e kanë kaluar sëmundjen dhe aktualisht janë vetëm 79,695 të infektuar aktivë.

Të martën, Kryeministri Pedro Sanchez përpiloi një plan me katër faza për heqjen e masave, me synim rikthimin në normalitet nga fundi i qershorit, kur do të hapen edhe plazhet. Sidoqoftë, zona të ndryshme të vendit do të ecin me shpejtësi të ndryshme përmes fazave, në varësi të shkallës së zhvillimit të infeksionit dhe kritere të tjera, si qëndrimi karshi rregullave të distancimit social. 

Shkalla e infeksionit nga koronavirusi në Gjermani tani është 0.76 kurse një ditë më parë ajo ishte 0.9 që do të thotë se rreth 1.500 njerëz infektohen më pak çdo ditë, krahasuar me javën e kaluar.

Instituti Koch ka saktësuar se mosha mesatare e infektimeve është 50 vjet dhe ajo e të vdekurve është rreth 81.

Ndërkohë, qeveria gjermane po përgatitet të zgjasë periudhën e kufizimeve "të paktën" deri në 10 maj, siç njoftohet nga kreu i kancelarit, Helge Braun.

Agjencia Federale e Punësimit ka dhënë një shifër tronditëse këtë mëngjes: kriza tashmë ka bërë që 10.1 milion njerëz të punojnë me orët e reduktuara.

Nga sot, në Maqedoninë e Veriut nis zbatimi i dekretit për mbajtjen e detyrueshme të maskës, shallit apo facoletës për të mbuluar gojën dhe hundën, si masë mbrojtëse për parandalimin e përhapjes së Covid-19.

Sipas dekretit të miratuar nga Qeveria, cdo qytetar që në ambiente të mbyllura nuk mban pajisje për mbrojtje personale do të dënohet me nga 20 euro, ndërsa kompanitë që nuk do të respektojnë këto masa, rrezikojnë një një ndëshkim me deri në 2 000 euro.

Në ambientet e mbyllura publike përfshihen marketet, dyqanet, bankat, zyrat postare, objektet shëndetësore si dhe transporti publik. Pajisjet mbrojtëse në sipërfaqe të hapura duhet të mbahen në tregje dhe vende ku nuk ekziston mundësia e ruajtjes së distancësn fizike prej dy metrash.

Sipas dekretit, mjetet mbrojtëse në ambjente të hapura nuk do të mbahen vetëm nëse qëndrohet në oborr ose në tarracën, apo kur lëvizet me bicikletë dhe makinë me familjarët.

"Spanja, e ndjekur nga Italia, Mbretëria e Bashkuar, Gjermania dhe Franca kanë ende numrin më të madh të rasteve "të Covid 19", por falë masave të marra ne tani po vërejmë rrafshnaltë në kurbën e pandemisë dhe ulje të numri i çështjeve të reja".

Kjo u deklarua nga Hans Kluge, drejtori rajonal i OBSH për Europën, në një konferencë për shtyp, duke shtuar se "ne duhet të monitorojmë nga afër këtë zhvillim pozitiv".

Kluge tha gjithashtu se “Shëndeti duhet të jetë në krye të axhendës politike. Pa shëndet nuk ka ekonomi dhe nuk ka siguri. Ky është një mësim për të mos u harruar”, dhe shtoi se “Situata e epidemisë Covid 19 në Evropë mbetet serioze dhe "e ndryshme nga njeri vend në tjetrin”

Kluge: "Gati për valën e dytë dhe të tretë"

Kur vala e parë e koronavirusit të kalojë, duhet të përgatitemi për një fazë të dytë dhe të tretë të pandemisë”- tha Kluge. "Ne duhet të jemi të përgatitur," përsëriti ai, duke theksuar se shëndeti publik "duhet të ketë përparësi më të madhe në shoqëri tani e tutje”.

21 nga 44 vendet e Evropës po lehtësojnë kufizimet

Nga 44 vendet e rajonit evropian që kanë zbatuar kufizime, 21 kanë filluar të lehtësojnë masat dhe 11 të tjera po planifikojnë ta bëjnë këtë në ditët e ardhshme, tha Kluge. "Siç e thashë edhe më parë, ky virus nuk fal, ne duhet të mbetemi vigjilent, të vazhdojmë dhe të jemi të durueshëm, të gatshëm për të intensifikuar masat ku dhe kur është e nevojshme”.

Ndërsa Mbretëria e Bashkuar ka kaluar Spanjën dhe Francën, dhe renditet pas Italisë për numrin e viktimave nga koronavirusi, ekspertët britanikë thonë se vendi ndodhet në një "moment të rrezikshëm" dhe piku i epidemisë ende nuk ka kaluar teksa numri i vdekjeve u rrit në mbi 26,000, pas regjistrimit të viktimave në shtëpitë e të moshuarve,  dhe jo vetëm spitale.

Gjatë konferencës ditore për shtyp, Sekretari i Parë i Shtetit, Dominic Raab, i kërkoi durimit popullatës teksa tha se "Tani jemi duke punuar në të gjitha opsionet e mundshme për fazën 2. Ka dritë në fund të tunelit. Ne duhet të jemi të durueshëm dhe të jemi të kujdesshëm kur të përballemi me momente të tjera të rrezikut maksimal”

Në Spanjë, numri i përditshëm i vdekjeve është në rënie të vazhdueshme, por planet për fazën 2 janë ende shqetësuese pasi autoritetet mendojnë se njerëzit do ti shmangen ruajtjes së distancës sociale

Me mbi 24,000 viktima të regjistruara, kufizimet në Francë duket se do të lehtësohen pas 11 majit por jo për të gjithë. Baret dhe restorantet do të qëndrojnë ende të mbyllura dhe mund të rihapen në fillim të qershorit.

Zviceranët tani duket se mund të marrin frymë. Lehtësimi i masave duket se do të filloi më herët nga sa ishte menduar: të gjitha dyqanet, restorantet, baret dhe muzetë do të rihapen duke filluar nga 11 maji. Natyrisht që duhet të respektohen kushtet e rrepta: në fillim vetëm katër persona ose dy prindër do lejohen në të njëjtën tryezë të shoqëruar nga fëmijët e tyre. Një distancë prej të paktën dy metrash ose elementë të veçantë ndarës duhet të ruhen midis grupeve të ndryshme.

Parisi zyrtar planifikon lehtësimin progresiv të masave kufizuese nga 11 maji.

Mbajtja e maskave do të jetë e detyrueshme në transportin publik. Parisi synon të shpërndajë 2 milionë maska, duke i dhënë përparësi të moshuarve dhe personave të tjerë të cenueshëm. Stacionet e autobusëve, stacionet e metrosë, palestrat dhe çerdhet do të pajisen me xhel dezinfektues.

Testimi do të zhvillohet në zonat që kanë numër të madh rastesh të infektuarish.

Në planin afatgjatë, kryebashkiakia Anne Hidalgo po synon “qytetin 15-minutësh”, ku shumica e nevojave ditore kryhen në një distancë të afërt ku mund të shkohet në këmbë, me biçikletë ose me transport publik, për të zvogëluar grumbullimet dhe ndotjen dhe për të përmirësuar cilësinë e jetës.

Berlini do të lehtësojë një mori kufizimesh më 4 maj. Transporti publik do të rifillojë shërbimin normal dhe muzetë, bibliotekat dhe terrenet sportive të hapura do të mund të hapen duke praktikuar distancimin social.

Protestat, ceremonitë fetare dhe tubimet në ambient të hapur me një pjesëmarrje prej më pak se 50 personash do të lejohen, nëse pjesëmarrësit mbajnë një distancë prej 1.5 metrash. Tiergarteni i njohur i Berlinit, një park i madh me një kopsht zoologjik, mund të rihapet, por hapësirat me kafshë do të qëndrojnë të mbyllura.

Ashtu si në pjesën tjetër të Gjermanisë, sallonet e makinave, dyqanet që shesin biçikleta dhe libraritë u lejuan të rihapeshin të hënën, së bashku me të gjitha dyqanet e vegjël. Shkollat ​​u hapën gjithashtu për nxënësit që kanë për të dhënë provime dhe do të hapen gradualisht për të tjerët nga 4 maji.

Tani është e detyrueshme që të gjithë të mbajnë maskë kur bëjnë blerje ose përdorin transportin publik.

Parukeritë janë lejuar të rihapen, por duhet të veshin pajisje mbrojtëse dhe të krijojnë distancë për klientët.

Në Frankfurt, dyqanet që shesin akullore hanë lejuar të hapen, por vetëm për shërbim “take away”, por akulloret nuk mund të shiten me kaush për të parandaluar infektimin dhe as nuk mund të konsumohen brenda një rrezeje prej 50 metrash nga dyqani, për të parandaluar grumbullimin e njerëzve.

Presidenti amerikan Donald Trump deklaroi se udhëzimet e qeverisë federale për distancimin fizik të vendosura për të kontrolluar përhapjen e koronavirusit do të përfundojnë të enjten, atëherë kur dhe u skadon afati, dhe kur shtetet të fillojnë masat për rihpjen e ekonomisë.

Trump i bëri komentet pas një takimi në Shtëpinë e Bardhë me Guvernatorin e Luizianës, John Bel Edwards. "Udhëzimet për distancimin fizik do të përfundojnë, sepse tani guvernatorët po e bëjnë këtë. Kam zhvilluar shumë biseda telefonike me ta, me  Guvernatorin e Teksasit Greg Abbot dhe shumë guvernatorë të tjerë. Po bisedojmë me shumë njerëz të ndryshëm dhe ata po na shpjegojnë hapat që po ndërmarrin. Unë jam në favor të masave që ata po ndërmarrin. Ne po e rihapim vendin”  deklaroi kreu i Shtëpisë së Bardhë.

Administrata e Presidentit Trump thotë se udhëzimet e lëshuara 45 ditë më parë janë përfshirë në rekomandimet që u janë dhënë shteteve mbi fillimin e procesit të rihapjes graduale të ekonomive të tyre.

“Ne kemi lëshuar udhëzimet para 45 ditësh, fillimisht për 15 ditë pastaj i zgjatëm për 30 ditë për të ngadalësuar përhapjen (e koronavirusit). Çdo shtet në Amerikë ka respektuar ato udhëzime dhe në disa raste i ka zgjeruar ato. Tani ne jemi të përqëndruar në bashkëpunimin me guvernatorët e shteteve si guvenratori John Bel Edwards për të zbuluar planet për rihapjen e shteteve të tyre. Ne kemi lëshuar udhëzime të reja për rihapjen në mënyrë të sigurt dhe të përgjegjshme të shteteve dhe të gjithë Amerikës”, tha Nënpresidenti Pence, i cili ishte i pranishëm në takimin në Shtëpinë e Bardhë mes Guvernatorit të Luizianës dhe Presidentit Trump.

Lajmi vjen në një ditë që solli shenja shpresëdhënëse për një trajtim të ri të koronavirusit së bashku me shifrat e zymta ekonomike. Ekonomia e Shteteve të Bashkuara u tkurr 4.8 për qind në tremujorin e kaluar.

Suedia po, Suedia jo. Të gjithë të flasin për vendin nordik dhe masat e saj të buta të bllokimit dhe izolimit. Organizata shëndetësore botërore, nga ana tjetër, nuk ka dyshime.

Kreu i Programit të Emergjencave të Urgjencës, Mike Ryan tha se "Njerëzit mendojnë se Suedia nuk ka bërë asgjë, por në fakt Suedia ka zbatuar masa shumë të forta dhe ka shkuar drejtpërdrejt në fazën e bashkëjetesës me koronavirusin, pra në "fazën 2" në të cilën e gjithë bota po përgatitet të futet.

Nëse prej pandemisë do na duhet të jetojmë në një mënyrë të re, Suedia mund të jetë shembulli për tu ndjekur. Modeli i tyre është një strategji e fortë kontrolli dhe një besim dhe bashkëpunim i fortë i komunitetit te qeveria.

Ndërsa shumica e Evropës vendosi kufizime të mëdha në jetën publike për të frenuar përhapjen e koronavirusit, Suedia u dallua për të kundërtën.

Ajo nuk hyri në bllokim dhe nuk imponoi politika të rrepta për distancim social. Përkundrazi, mobilizoi popullsinë, duke u bazuar tek besimi që ka tek qytetarët e saj. Këshilloi të moshuarit të shmangin kontaktin shoqëror dhe rekomandoi që njerëzit të punojnë nga shtëpia, të lajnë duart rregullisht dhe të shmangin udhëtimet e panevojshme. Gjithashtu shkollat ​​për fëmijët nën-16 vjeç mbeten të hapura, ashtu si dhe shumë biznese, përfshirë restorante dhe bare.

Arkitekti i strategjisë, Anders Tegnell, një epidemiolog në Agjencinë e Shëndetit Publik të Suedisë, tha se kjo që po ndodh është e mbivlerësuar. “Kjo- tha ai- nuk është një sëmundje që mund të ndalet ose zhduket, të paktën deri sa të prodhohet një vaksinë dhe se “Mbyllja e kufijve është qesharake, sepse COVID-19 është në çdo vend europian tani".

Për herë të parë që nga muaji shkurt, Koreja e Jugut ka raportuar 'zero raste' të infeksionit nga koronavirusi.

Shifra është një sukses për vendin aziatik, i cili ishte ndër ata më të prekur nga covid 19 por sidoqoftë, falë një fushate agresive dhe të suksesshme, shpesh është indikuar si model.

Që nga fillimi i pandemisë Koreja e Jugut ka regjistruar 10765 raste infeksioni dhe 247 viktima nga koronavirusi.

Gjermani

Gjermania ka regjistruar 1,478 raste të reja me koronavirus në 24 orët e fundit, duke shënuar ditën e katërt që numri i të prekurve është rritur.

Numri total i të infektuarve me këtë virus i është afruar shifrës 160,000 ndonëse rreth 75 për qind e tyre janë shëruar.

Aktualisht është thënë se janë vetëm 34,672 raste aktive.

Numri i të vdekurve që lidhen me sëmundjen Covid-19, që shkakton koronavirusi është rritur për 173, apo në total 6,288.

Autoritetet gjermane kanë nisur të lehtësojnë masat e izolimit javën e kaluar.

Ende nuk është e qartë nëse zyrtarët ia atribuojnë këtij vendimi rritjen e numrit të të prekurve – mirëpo sondazhet tregojnë se shumica e gjermanëve janë kundër përshpejtimit të procesit të kthimit në normalitet.

Presidenti amerikan Donald Trump edhe në konferencën e fundit në Shtëpinë e Bardhë, duke folur për pandeminë nga koronavirusi, sërish ka akuzuar Kinën se ka fshehur të dhënat mbi koronavirusin dhe ka manipuluar me shifrat, duke theksuar se Pekini zyrtar dëshiron dhe po punon që ai të humbasë në zgjedhjet presidenciale të 3 nëntorit.

Trump shtoi gjithashtu se ai po shqyrton mundësi të ndryshme se si të reagojë ndaj asaj që Pekini ka bërë në nxitjen e pandemisë: "Unë mund të bëj shumë", theksoi ai.

Përgjigja e Pekinit: jo për hetimin ndërkombëtar Covid, "i politizuar"

Kina është kundër një hetimi ndërkombëtar për pandeminë e koronavirusit, të cilin e konsideron "të politizuar për qëllim për të stigmatizuar Kinën" dhe mbështëtur në "akuza të pabaza" kundër Pekinit. Këtë theksoi Zëvendësministri i Jashtëm kinez, Le Yucheng, gjatë një interviste me transmetuesin amerikan NBC.

"Ky hetim arbitrar bazohet në prezumimin e fajit," shtoi zv / ministri kinez, "dhe ne e kundërshtojmë me forcë."