Mendja e të gjithë shqiptarëve sportdashës është në fazën play-off të Kupës së Botës 2026. Kombëtarja shqiptare e futbollit luan kundër Polonisë në Varshavë më 26 mars dhe një fitore do e dërgonte në finalen play-off kundër fituesit të çiftit Ukrainë - Suedi.

Gjatë javëve të fundit stafi i Kombëtares ka shtuar intensitetin e punës dhe ndarjen e informacioneve për rivalët, teksa me interes është lista e futbollistëve që do të grumbullohen për këtë duel.

Një formë shumë të mirë me klubet e tyre po kalojnë Anis Mehmeti dhe Ernest Muçi, dyshja që nuk është preferuar nga Sylvinho.

Në prag të grumbullimit, faqja e specializuar e tregut të futbollistëve 'Transfermarkt' ka përditësuar edhe vlerën e tyre. Futbollisti shqiptar me kartonin më të shtrenjtë rezulton Anis Mehmeti, sulmuesi anësor që në janar kaloi nga Bristol City te Ipswich po në Championshipin e Anglisë.

14 milionë euro duhet të paguajnë klubet e interesuara për të nëse duan ta afrojnë në ekip, por një gjë e tillë nuk është vlerësuar nga Sylvinho. Ka qenë pikërisht braziliani që e afroi Mehmetin në ekip gjatë marsit 2023 në ndeshjen kundër Polonisë, duke i dhënë tre paraqitje në fushë. Që prej qershorit të vitit 2023, Mehmeti nuk është preferuar nga Sylvinho paçka golave dhe paraqitjeve shumë të mira dhe 11 golave të këtij sezoni.

Në kanalet e komunikimit të shumtë janë tifozët që kërkojnë Mehmetin dhe Muçin në ekip, nisur kjo nga forma e mirë e tyre.

Në përditësimin e fundit të 'Transfermarkt', Mehmeti lë pas Kristjan Asllanin, Mirlind Dakun, Armando Brojën dhe Ernest Muçin. Pas tyre Ismajli, Berisha, Mitaj, Cristian Shpendi, Gjimshiti, Uzuni dhe Kumbulla.

Dymbëdhjetë futbollistët më të vlefshëm të Kombëtares sipas 'Transfermarkt'