Debate te Siguria, Noka: Drejtues
policie të përfshirë në trafik droge

Komisioni i Sigurisë Kombëtare është përfshirë nga debatet sot pas diskutimit për krimin e organizuar, drogën dhe dhunën në familje gjatë raportimit të Drejtorit të Përgjithshëm të Policisë për Rendin dhe Sigurinë, Altin Qato.
 
Deputeti i PD, Flamur Noka ka lëshuar akuza të forta në drejtim të policisë së shtetit, ndërsa sipas tij, Shqipëria është vend transit për drogën.
 
“Një Shqipëri që është vend transit i drogave të forta, nuk mund të ketë polici të besueshme.
 
Drejtues të lartë të policisë janë të përfshirë në trafikun e kanabisit. Ndërsa drejtues policie janë të larguar me kërkesë të ambasadës amerikane.
 
Nëse do vazhdoni ta mbani policinë në lidhje me krimin, do ta degradoni dhe kalbeni. Në 4 vitet që shkuan nuk u fol gjë tjetër vetëm për drogën.
 
Ato që thashë nuk bazohen në hamendje. Deklaratat e prokurorisë dhe informacionet e shërbimit sekret flasin për përfshirjen e zyrtarëve të policisë së shtetit janë të lidhur me drogën.
 
Partnerët ndërkombëtarë sidomos ata amerikane e kanë evidentuar këtë” deklaroi Noka.
 
Për zbulimin e grupeve të strukturuara kriminale në vend ka kërkuar informacion edhe deputeti i djathtë Ervin Salianji.
 
Ndërsa, deputeti i LSI, Endrit Brahimllari ka ngritur pyetjen se cfarë masash po merren nga policia për dhunën në familje, nisur nga rastet e fundit.
 
Qato ka deklaruar se “po analizojmë rastet dhe po studiojmë ndërhyrjen. Nuk mjafton policia. Duhet dhe partneritet mes aktoreve të tjerë”.

Dje burri vrau gruan në Pogradec, të shtunën xhaxhai vrau nipin në Shkodër, ndërsa pak javë më parë u vra nga burri gjyqtarja Hafizi.