Moti i keq dhe bora po pengojnë udhëtimin ajror dhe hekurudhor në një pjesë të madhe të Evropës. Ndërprerja më e madhe është përqendruar midis Francës dhe Holandës, ku kushtet e këqija të motit kanë detyruar anulime dhe kufizime të fluturimeve, dhe ku mijëra udhëtarë kanë mbetur të bllokuar në aeroporte duke pritur të hipin në bord.

Amsterdam: Anulohen 800 fluturime, trenat janë paralizuar gjithashtu

Për shkak të borës dhe erërave të forta, rreth 800 fluturime u anuluan dhe mbi një mijë udhëtarë mbetën të bllokuar gjatë natës në Aeroportin Amsterdam-Schiphol. Përmes një njoftimi aeroporti vuri në dukje se shumë njerëz kishin fjetur brenda terminalit në netët e mëparshme, por mbrëmë ishte nata e parë në të cilën u ngritën shtretër kampingu.

Schiphol pret që ky numër të rritet më tej, duke marrë parasysh se rreth 1,100 fluturime ishin planifikuar për sot . Kjo është dita e katërt e ndërprerjeve për një nga qendrat kryesore të transportit të Evropës. Të paktën 2,700 fluturime hyrëse dhe dalëse janë anuluar që nga Epifania. Rrjeti hekurudhor po përjeton gjithashtu ndërprerje serioze.

Trenat nuk po qarkullojnë në disa itinerare, ndërsa shërbimi është shumë i kufizuar në të tjerat. Trafiku hekurudhor Rotterdam Central dhe Breda është plotësisht i pezulluar dhe linja për në Belgjikë është gjithashtu jashtë shërbimit. 

Franca po përjeton gjithashtu reshje dëbore. Ministri i Transportit Philippe Tabarot njoftoi se 100 fluturime u anuluan këtë mëngjes në Aeroportin Charles de Gaulle të Parisit dhe rreth 40 të tjera në Aeroportin Orly. Mediat lokale raportuan se në rajonin Ile de France, kishte më shumë se 800 kilometra bllokime trafiku që nga ora 9:00 e mëngjesit të sotëm .

40 fluturime u anuluan edhe në Bruksel

Reshjet e borës po vazhdojnë në pjesën më të madhe të Belgjikës, ku autoritetet po u bëjnë thirrje banorëve të kufizojnë udhëtimet. Aeroporti Bruksel-Zaventem po raporton vonesa dhe anulime të afërsisht dyzet fluturimeve. Instituti Mbretëror Meteorologjik ka lëshuar një alarm portokalli për të gjithë ditën në të gjithë vendin, duke përjashtuar bregdetin. Kushtet e rrugëve janë të rrezikshme për shkak të akullit, veçanërisht në provincat e Hainaut dhe Liège, shkruan Corriere della Sera.