Dekriminalizimi/ PD-PS të ndarë
për efektet që sjellin platformat 

TIRANE- Procesi i “Dekriminalizimit”, do të përbëjë një pjesë të rëndësishme të debatit politik gjatë sesionit të ri të Kuvendit, i cili nis javën e parë të muajit të ardhshëm. Prej një periudhe 8 mujore, që prej marrëveshjes politike të dhjetorit 2014, komisioni i posaçëm parlamentar ka punuar me ritme të ngadalta, duke u përfshirë shpesh herë edhe nga akuzat dhe debatet e ashpra mes kryetarit të komisionit Oerd Bylykbashit dhe nënkryetarit Taulant Balla.

Opozita ka insistuar dhe i ka propozuar komisionit një platformë që synon përjashtimin nga Kuvendi dhe çdo funksion publik, të cilitdo të dënuar me vendim gjykate për veprat penale të krimit të organizuar dhe korrupsionit. Për ta aktualizuar platformën, PD ka propozuar ligjin italian “Severino”, i cili parashikon që personi humbet mandatin dhe të drejtë e ushtrimit të funksionit kur është i dënuar jo më pak se dy vjet për vepra penale të kryera me dashje dhe kur këto vepra penale dënohen deri në 4 vjet apo më shumë.