Deputetë të PS në shtëpinë
e Hekuran Dedës

TIRANE- Një grup deputetësh të Partisë Socialiste kanë qenë sot në shtëpinë e familjarëve të Hekuran Dedës,njërit prej viktimave të 21 janarit. Burime nga “shqiptarja.com” bëjnë të ditur se familjarët e Hekuran Dedës kanë shtruar sot në mesditë një drekë përkujtimore me rastin e një vjetorit të humbjes së të afërmit të tyre dhe në këtë drekë kanë ftuar edhe deputetë të PS-së. Mes deputetëve të pranishëm kanë qenë dhe vetë Gramoz Ruçi, kryetari i Grupit PS-së dhe deputeti socialist Namik Dokle.

Babai i dy fëmijëve është një nga viktimat e 21 janarit 2011, të cilët së bashku me Ziver Veizin, Faik Myrton gjetën vdekjen gjatë demonstratës së 21 janarit, ndërsa Aleks Nika u plagos rëndë dhe humbi jetën pak ditë më vonë. Sipas prokurorisë nga filmimet rezulton se viktimat, në momentin që janë qëlluar me armë, kanë qenë jashtë objektit të kryeministrisë. Aktualisht, për 4 vrasjet në bulevard, në burg ndodhet vetëm gardisti Agim Llupo, nga arma e të cilit, është vërtetuar qartazi se është vrarë Ziver Veizi.(ne foto pamje nga ceremonia homazh pas demonstrates se 21 janarit)
(sg/shqiptarja.com)