Deputetët britanikë raport për menaxhimin e pandemisë së COVID: Një nga dështimet më të këqija të shëndetit publik! U synua imuniteti i tufës nëpërmjet infektimeve

"Një nga dështimet më të këqija të shëndetit publik" e kanë konsideruar në një raport deputetët britanikë masat e marra fillimisht nga qeveria për të ndalur përhapjen e COVID. Sipas tyre, qasja e qeverisë, e mbështetur nga shkencëtarët e saj, ishte të arrinte imunitetin e tufës me infeksion. Kjo çoi në një vonesë në prezantimin e bllokimit të parë , duke kushtuar jetë njerëzish.

Raporti kryesisht përqendrohet në përgjigjen ndaj pandemisë në Angli. Komiteti nuk shikoi hapat e ndërmarrë individualisht nga Uellsi, Irlanda e Veriut dhe Skocia.

Raporti, 150 faqe, përmend edhe sukseset e qeverisë në menaxhimin e pandemisë, që ka marrë në Britani 150 mijë jetë, ndërsa deputetët e kanë përshkruar si 'sfida më e madhe në kohë paqeje'. Po ashtu ata pranojnë se përballë një situate të tillë, ishte 'e pamundur që gjithçka të bëhej siç duhej'.

"Mbretëria e Bashkuar ka kombinuar disa arritje të mëdha me disa gabime të mëdha. Është jetike të mësosh nga të dyja", shtuan ata në një deklaratë për të shoqëruar raportin.

Një zëdhënës i qeverisë tha se mësimet do të merreshin, dhe se kjo ishte arsyeja pse do të kishte një hetim të plotë publik vitin e ardhshëm.

TAG:
• Britani e Madhe
• COVID-19
• masat anticovid