Deputeti i LSI akuzon: ‘Siguria’
u kthye komision ekskursionesh

Deputeti i LSI, Indrit Brahimllari akuzon socialistët se po e kthejnë Komisionin e Sigurisë Kombëtare në komision ekskursionesh. “U bë e disata herë që njoftohemi si anëtarë të Komisionit të Sigurisë Kombëtare për vizita njohëse nëpër godina të ndryshme të vendit” thotë ai.

Por sipas tij, sot në komision duhet të diskutohet për ekstradimin e Nezar Seiti, por edhe radarët, drogën dhe cështje të tjera që kanë të bëjnë me sigurinë e vendit.

Statusi i Indrit Brahimllarit
Partia-shtet e kthen Komisionin e Sigurisë Kombëtare në komision ekskursionesh! U bë e disata herë që njoftohemi si anëtarë të Komisionit të Sigurisë Kombëtare për vizita njohëse nëpër godina të ndryshme të vendit. Në komisionin e sigurisë kombëtare nuk diskutohen çështje të rëndësishme që kanë të bëjnë me thelbin e tij, çështje të sigurisë kombëtare.

Sot në komision duhet të diskutohet për ekstradimin e Nezar Seiti, për çështjen e radarëve që fiken dhe ndizen sa herë që do bosi i drogës, për krimin e organizuar, per vrasjet që ndodhin në mes të ditës në sy të qytetarëve, për trafikun e drogës, për anijet e peshkimit që i mungon sinjali GIS i sistemit Bluebox, duke cënuar rëndë sigurinë kombëtare.

Kësaj qeverie të lidhur me krimin nuk i interesojnë këto çështje sepse janë vetë të përfshirë në trafiqe duke cënuar rëndë sigurinë kombëtare.

d.b/shqiptarja.com