Deputeti i PD paralajmëron
Ramën:Asnjë ditë s'do flesh i qetë!

Deputeti demokrat, Ervin Salianji, ka reaguar pas vendimit të policisë për t’u proceduar penalisht bashkë me nëntë deputetë të tjerë të PD dhe LSI, pas situatës që krijuan dje brenda dhe jashtë Kuvendit.

Salianji ironizon kryeministrin Edi Rama, teksa shkruan në ‘Facebook’ se në ditën e parë si kryeprokuror, duke nënkuptuar organi i akuzës është tashmë në duart e kryeministrit, nisi me ëndrrën e tij në sirtar, asgjësimin e opozitës.

Në reagimin e tij të fortë, Salianji ka paralajmëruar Ramën se nuk do të flejë asnjë ditë i qetë dhe se kusuret e tij do t’i paguajë vetë.

“Dita e parë në punë e kryeprokurorit Rama nis me ëndrrën të tij në sirtar, asgjësimin e opozitës dhe mbretërimin mes parave të nxjerra nga gjaku dhe zhvatja e qytetarëve shqiptarë! Asnjë ditë s’ka për të fjetur i qetë, kusuret e tij do t’i paguajë ai vetë. Prokuroria dhe gjykatat duhet të hetojnë dhe çojnë pas hekurave kriminele, banditë dhe të korruptuarit e qeverisë që po e çojnë Shqipërinë në greminë. Duhet të nisë nnga Rama që po privatizon Shqipërinë dhe ka patologjinë se do skllavërojë dhe popullin! Ai është skllavi më i madh, skllav i parasë dhe i vesit.

Nga dita e djeshme mbetet vetëm një pishman; duhej reaguar edhe me fort! Kemi kryer vetëm detyrën shtetërore që na ngarkon ligji; në shërbim të qytetarëve dhe në mbrojtje të kushtetutës. Puçistët që ishin duke vjedhur votat e opozitës për të emëruar Ramën Prokuror, nuk janë të opozitës. Mbrojtja e qytetarëve nga pushteti pa kufi është pa asnjë diskutim detyrë e opozitës. Një pishman kam nga dita e djeshme, duhej reaguar më fort. Me këta ka vetëm një rrugë, përballja pa kthim!”, shkruan Salianji.

d.c./shqiptarja.com