Derbi me Tiranën, Dritan Mehmeti: Dinamo ka dy mungesa, futemi për tri pikë

Tirana dhe Dinamo përballen nesër në "Air Albania" për raundin e 28-të në Superligën e futbollit. Me fillim nga ora 17:00 e gjithë vëmendja do jetë në derbin e kryeqytetit, teksa të dyja skuadrat kanë nga 36 pikë në renditje dhe ndajnë vendet pesë dhe gjashtë në renditje.

Përpara ndeshjes për mediet foli trajneri i Dinamos. Dritan Mehmeti vlerësoi duelin historik, duke shtuar se të tijtë janë me dy mungesa. Gudiabi mungon prej dëmtimit, ndërsa Patrik Bardhi që do të mungojë për 10 ditë po për lëndim.

"Nuk ka ndonjë ndryshim të madh, nëse luajtëm apo jo me Teutën. Ishim në një ritëm të mirë dhe kemi pasur një ndalesë në mikrociklin javor. Janë faktorë që nuk ndikojnë te ndeshja me Tiranën.

Për të përgatitur një derbi, bonusi emocioal është në maksimumin e vet. Ka motivimin e brendshëm për lojtarët. Në aspketin tekniko-taktik jemi përqendruar më shumë. Derbi është i paparashikueshëm, ndeshja mund të japë një përgjigje të saktë si e kemi përgatitur.

Mungesat? Mungojnë Gudiabi për dëmtim, po ashtu edhe Patrik Bardhi, që do të mungojë për 10 ditë. Këto janë problemet e vetme që kemi. Nuk ka diferenca pikësh dhe skuadrat kanë pasur ndryshime të shumta në tabelë. Tani nuk ka më kohë rikuperimi dhe duhet të jemi të përqendruar te loja.

Dinamo ka kaluar tranzicione herë pas herë. Vijmë nga kategoria e parë në Superiore dhe ndërrimet e stafeve ndikojnë në oshilacionet gjatë sezonit. Ndoshta lojtarët kanë pasur përgjegjësi më të madhe se sa duhet për të dhënë më të mirën. Dinamo është rritur goxha sa i takon mentalitetit fitues, skuadra ka fituar besimin për vlerat që posedon.

Problematikat e Tiranës? Nuk ndikojnë. Ndonjëherë skuadra me më shumë probleme ka dalë fitimtare, lojtarët nxjerrin nga vetja më të mirën në derbi. Një skuadër, kur kalon një periudhë të keqe, jep më të mirën në derbi për ta kaluar.

Objektivi? Ne kemi një objektiv si staf dhe klub, të kemi stabilitet dhe të kemi një skuadër kompetitive për të ardhmen. Duhet të jemi të përqendruar te ndeshja e radhës, nuk duhet ta shohim si finale për të qenë më të qetë. Po menduam më gjatë, do të shpërqendrohemi.

Stadiumi? “Air Albania” është teatër futbolli dhe është kënaqësi për të gjithë të luajnë në të tilla stadiume. Ndihesh vërtet komod dhe e shijon. Mendoj do të jetë diçka shumë e mirë për ne, që luajmë ndeshjen e parë këtë sezon në këtë stadium. Shpresoj të marrim atë që do të japim në fushë", tha Mehmeti.

S.DH/Shqiptarja.com

TAG:
• superliga
• Dinamo
• tirana
• Tirane