Detajet nga përgjimet që ‘fundosën’ Fredi Belerin! Çfarë roli kishte bashkëpunëtori i drejtësisë, komunikoi me kandidatin pesë ditë më parë

Detaje të reja janë zbuluar nga arrestimi i kandidatit të koalicionit Meta-Berisha për bashkinë e Himarës, Fredi Beleri. Mediat raportojnë se i infiltruar i drejtësisë që ka firmosur marrëveshje bashkëpunimi me autoritetet, hyri në diskutim me Belerin pesë ditë para arrestimit në pazaret për shit-blerjen e votës. 40 mijë lekë të vjetra janë dhënë për 8 vota, ndërsa mësohet se Fredi Bleri i kishte premtuar bashkëpunëtorit të policisë se nëse do ua blinte votat këtyre 8 personave do t’i jepte 40 mijë lekë për 8 votuesit dhe 30 mijë lekë për atë vetë.

Sipas TCH, për ta bindur personin që bashkëpunoi me drejtësinë i është treguar dhe lista e zgjedhësve që bashkëpunëtori i drejtësisë tha se i kishte gati.

Ndihmësi i Belerit dyshohet se është personi që në vëzhgimet ambientale ia çon paratë bashkëpunëtorit të drejtësisë. Ky i fundit u vonua në takim dhe në një moment ndihmësi e telefonon Belerin duke i treguar se personi nuk gjendej aty. Beleri shprehet “prit një minutë” dhe më pas bashkëpunëtori i drejtësisë shfaqet në vendtakim për të marrë paratë nga ndihmësi i Belerit. TCH shkruan se sipas dosjes së hetimit rezulton që paratë për tetë vota u dhanë në një WC dhe se ky moment është vetëm me audio dhe jo i filmuar dhe me kamera sikurse takimet e tjera nën vëzhgim nga një grup i Policisë së Shtetit të dërguar nga Tirana.

Lajmi kryesor:

VIDEO/ Ra në 'grackën' e të infiltruarit, arrestohet kandidati i Berisha-Meta për Himarën, Fredi Beleri u kap duke blerë 8 vota për 40 mijë lekë (DOKUMENTI)

SI.E./Shqiptarja.com

TAG:
• fredi beleri
• Vlore
• BASHKIA HIMARE
• himare
• arrestohet Fredi Beleri
• zgjedhjet vendore 2023