Takimi në Berlin/ Scholz: Dialogu të sjellë marrëveshje gjithëpërfshirëse! Kurti: Njohja reciproke duhet të jetë në qendër, jo në fund! Vuçiç: Nuk varet vetëm nga ne

Kancelari gjerman Olaf Scholz është takuar me presidentin e Serbisë, Aleksandër Vuçiç në Berlin. Në konferencë për mediat thanë se fokus i bisedimeve ishte dialogu me Kosovën. Presidenti serb tha se Beogradi është i gatshëm për një marrëveshje me Prishtinën.

“Do të përpiqemi që të gjejmë një marrëveshje kompromisi, por siç e kemi të qartë, kjo nuk varet vetëm nga dëshirat tona, por edhe të palës tjetër”, ka deklaruar Vuçiç ndërsa shtoi se do të gjendet kurajo për të bërë progres në këtë proces që nuk e konsideron të lehtë për Serbinë.

Ndërsa Scholz tha se të gjitha detyrimet duhet të respektohen dhe se lëvizjet e njëanshme nuk janë të dobishme.

“Kam biseduar me presidentin Vuçiç për rëndësinë e progresit në dialog që duhet të çojë në një marrëveshje gjithëpërfshirëse. Të gjitha çështjet e hapura duhet të zgjidhen brenda dialogut, kjo kërkon guxim dhe vendosmëri dhe të gjitha detyrimet e dakorduara duhet të respektohen”, tha Scholz.

Ndërsa për luftën në Ukrainë, presidenti Vuçiç tha se Serbia e ka kuptuar mirë mesazhin e Gjermanisë.

 “Sa i përket Serbisë, ne kemi një qëndrim tjetër për Kosovën, Serbia ka qenë nën sanksione për një dekadë të tërë dhe është një ndjenjë ndryshe nga shumica e të tjerëve. Serbia e kuptoi mesazhin e Gjermanisë dhe të gjithë të tjerëve”, tha Vuçiç.

Kryeministri i Kosovës, Albin Kurti, duke marrë shkas nga Lufta në Ukrainë, dhe skenarëve të tjerë që flasin për trazira në Ballkan, tha se Kosova nuk është e frikësuar, por sigurisht janë vigjilentë.

“Nuk jemi të frikësuar, por vigjilentë, ndonëse Kosova nuk është në NARTO, NATO është në Kosovë, ne nuk jemi në BE, por BE është te ne, nuk kemi alternativë përveç BE dhe NATO dhe do e mbrojmë progresin tonë ndaj çdo rreziku që na shfaqet “, tha Kurti.

Në konferencën për mediat pas takimit me kancelarin Scholz, kryeministri i Kosovës, Albin Kurti tha se biseduan për dialogun me Serbinë.

"Kemi folur për dialogun me Serbinë, dialogu duhet të jetë i përqendruar me njohje reciproke. Pikëpamja e bindja jonë është që njohja reciproke duhet të jetë në qendër, jo në fund. Jemi të përqendruar për të pasur rezultate konkrete", tha Albin Kurti.

Ndër të tjera foli për liberalizimin e voizave duke thënë se Kosova i ka plotësuar të gjitha kriteret, ndaj është radha e BE-së për të vijuar procesin. Për këtë ra dakord edhe Scholz duke thënë se Gjermania do ta mbështesë procesin e liberalizimit të vizave për Kosovën.

“Edhe dy muaj bëhen katër vite prej se Komisioni Evropian e ka rekomanduar liberalizimin e vizave për Kosovën për herë të dytë. Është koha të thuhet se mjaft është mjaft. Kjo çështje duhet të vendoset në Këshillin e BE-së pasi Kosova i ka kryer detyrat e shtëpisë, dhe është radhe që edhe BE të kryej detyrat e saj”, tha Kurti.

Kurti tha se Kosova do të aplikojë për anëtarësim në Këshillin e Evropës dhe partneritet me NATO-n.

Kancelari i Gjermanisë, Olaf Scholz tha se me kryeministrin Kurti folën për disa cështje ndërsa paralajmëroi vizitë në Prishtinë. Scholz u shpreh se është i lumtur për bashkëpunimin e qeverive të dy vendeve që do të forcojë pavarësinë energjetike dhe do të përmirësojë cilësinë e ajrit. Sa i përket liberalizimit të vizave, u shpreh se duhet të bëhet përparim i mëtejshëm dhe për këtë do të angazhohet me këmbëngulje.

“Përparimi i mëtejshëm duhet të bëhet tani edhe në liberalizimin e vizave për Kosovën. Qeveria federale e ka fiksuar këtë si objektiv në marrëveshjen e koalicionit. Për këtë unë angazhohem me këmbëngulje në Bashkimin Europian, në biseda me partnerët; angazhohem me këmbëngulje”, tha Scholz.

Scholz përmendi edhe bashkëpunimin rajonal duke thënë se ka vite që Gjermania angazhohet në këtë rajon me procesin e Berlinit. Ai përmendi katër marrëveshje të rëndësishme që tha se do të nënshkruhen në gjysmën e dytë të këtij viti në kuadër të Procesit të Berlinit.

“Projekti më i rëndësishëm është krijimi i një tregu të përbashkët rajonal”, tha Scholz duke paralajmëruar marrëveshje për lëvizjen e lirë të personave dhe njohjen e diplomave profesionale.