Dialogu me Serbinë varet nga
zbatimi i Marrëveshjes së 19 prillit

PRISHTINE - E ardhmja e dialogut dhe Marrëveshjes së 19 prillit 2013 do të varen nga dinamika e zbatimit të pikave që kanë të bëjnë me largimin e plotë të strukturave ilegale të Serbisë, funksionimin e Asociacionit të Komunave Serbe sipas ligjeve të Kosovës, marrëveshja për gjykatat në veri, si dhe zbatimi i marrëveshjes së arritur në dialogun teknik
 
Me gjithë ngecjet në implementim të marrëveshjeve, Qeveria e Kosovës pret që formati i takimeve në nivelin politik mes Kosovës dhe Serbisë të mbetet i njëjti edhe pas përfundimit të zgjedhjeve në Serbi - shkruan Koha Ditore.
 
Derisa të krijohet qeveria e re në Serbi, nuk do të ketë edhe një takim të radhës mes kryeministrave Hashim Thaçi e Ivica Daçiç, kanë bërë të ditur zyrtarë të Qeverisë së Kosovës. Ndërsa shumë pika të marrëveshjes së 19 prillit 2013, të cilat tanimë do duhej të ishin përmbushur, kanë ngecur për shkak të refuzimit të Serbisë që t’i zbatojë ato.
 
Me gjithë bllokimet, zyrtarë të Qeverisë së Kosovës vazhdojnë të deklarohen publikisht se zbatimi i Marrëveshjes së 19 prillit po vazhdon dhe se rezultatet janë të prekshme. Bekim Çollaku, këshilltar i lartë i kryeministrit Thaçi ka thënë se integrimi i pjesëtarëve të MUP-it është në fazën përfundimtare.
 
Redaksia online
(ac/shqiptarja.com)