Dita e Arbëreshëve dhe Samiti III për Diasporën mbahen në Tiranë në datat 22-23 nëntor

Samiti III i Diasporës do të zhvillohet më 23 Nëntor. Lajmin e bën me dije Ministria për Europën dhe Punët e Jashtme e cila ka njoftuar gjithashtu se një ditë më parë, më 22 Nëntor do të zhvillohet Dita e Arbëreshëve.

“Nën kujdesin e Kryeministrit të Republikës së Shqipërisë , z. Edi Rama, Ministria për Evropën dhe Punët e Jashtme ka kënaqësinë t’ju ftojë në Ditën Arbëreshe dhe Samitin e III të Diasporës, që do të zhvillohen më datat 22-23 nëntor 2023, në Tiranë”, njoftoi ministria e Jashtme.

Ky Samit i tretë i Diasporës do të fokusohet në diskutimet mbi të ardhmen sociale, politike dhe ekonomike të Shqipërisë. Qëllimi i këtij samiti është rigjallërimi i bashkëpunimit midis vendit amë dhe Diasporës, duke theksuar rëndësinë e rolit të diasporës në të ardhmen e vendit dhe në përballjen me sfidat e sotme dhe të ardhshme.

Të interesuarit mund të regjistrohen këtu për të marrë pjesë në aktivitetet e ndryshme.