Kompjuteri kuantik, shkencëtarët tentojnë të kopjojnë 'dorën e Zotit'

Qendrat më të mëdha kërkimore teknologjike në Evropë, Amerikë dhe Kinë janë në garë se kush do të sjellë i pari në jetë kompjuterin kuantik. Shkencëtarët evropianë thonë se janë përpara kolegëve të tyre në Amerikë apo Kinë për këtë pajisje të re tekonologjike që pritet të sjellë epokë tjetër për njerëzimin.

Shpejtësia me të cilën përpunon të dhënat ky kompjuter është e atillë si të imagjinosh një lojë futbolli me 1 milion topa njëkohësisht, jo me një si tani, thotë njëri prej shkencëtarëve.

Prodhimi i këtij kompjuteri është tema qendrore e shkencëtarëve dhe qeverive anekënd botës. Duke tentuar të riprodhojnë trurin e njeriut, me gjithë kompleksitetin e vet, shkencëtarët ngjan se kanë hyrë në garë me Krijuesin.

Për evropianët kjo nuk është fantashkencë, pasi janë ambiciozë dhe kërkojnë që në vitin 2026 të kenë prototipin e parë për ta përdorur në industri. Italianët kanë mobilizuar gjashtë qendra kërkimore për këtë makineri të re të së ardhmes, ndërsa fondet qeveritare janë të shumta.

Shpejtësia e përpunimit të të dhënave që mund të bëjë ky kompjuter mund të ndikojë në kurimin e shumë sëmundjeve, sikundër edhe në ndërtimin e pajisjeve të tjera elektronike.

Me kompjuterët e sotëm kemi arritur të prodhojmë këto telefona që kemi në dorë dhe të flasim në sekondë me njëri – tjetrin nga një cep i botës në një tjetër, imagjino se çfarë mund të bëjmë me gjeneratën e re të kompjuterëve kuantikë, thotë një nga shkencëtarët italianë./ Përgatiti Sebastian Zonja

B.K./KT/Shqiptarja.com

TAG:
• kompjuteri kuantik
• Europë
• amerike
• Kine