Dokumenti/Opozita mbron 
dekoratat e ish-sigurimsave

TIRANË - Pas kauzës së dekriminalizimit dhe parkut tek liqeni, Partisë Demokratike po i lëkundet edhe kauza 25-vjeçare, ajo e anti-komunizmit. E themeluar si parti anti-komuniste, për të sjellë më pas edhe pluralizmin në Shqipëri, Partia Demokratike, 25 vjet më vonë, ka dhënë disa shenja të qarta me votë kundër distancimit nga e kaluara.

Pas votës kundër një amendamenti për dekomunistizimin, ligjvënësit e Partisë Demokratike në Komisionin e Sigurisë, janë pozicionuar kundër një nisme ligjore, e cila parashikon heqjen e dekoratave, titujve dhe medaljeve për Enver Hoxhën, ish-bashkëpunëtorët e Sigurimit të Shtetit dhe disa antifashistë të parë, por që më pas kanë mbajtur funksione të rëndësishme në pushtetin komunist.

Pavarësisht retorikës dhe debateve për të miratuar një rezolutë kundër komunikimit, partia më e madhe në opozitë, ka shfaqur një tjetër qëndrim në raport me projektligjin e propozuar nga Mesila Doda dhe Shpëtim Idrizi “Për një shtesë në ligjin nr. 112/20134 “Për dekoratat, titujt e nderit, medaljet dhe titujt vendorë të nderit në RSH”.