Liderët e vendeve të G7, përfshirë presidentin amerikan Donald Trump, miratuan një deklaratë të përbashkët ku zotohen të rrisin mbështetjen ushtarake për Ukrainën dhe të forcojnë sanksionet ndaj Rusisë.

Deklarata u publikua në orët e para të së mërkurës, në përfundim të një dite që u karakterizua nga një qëndrim i përbashkët mes Trump dhe liderëve të tjerë të G7 për luftën në Ukrainë.

“Në mënyrë të palëkundur mbështesim Ukrainën në mbrojtjen e lirisë, sovranitetit dhe integritetit territorial të saj”, thuhet në dokument.

Liderët e G7 angazhohen të rrisin presionin ndaj ekonomisë ruse dhe të forcojnë sanksionet, përfshirë ato që prekin sektorët e naftës dhe gazit. Në deklaratë thuhet se tani është momenti për masa të tjera ekonomike ndaj Rusisë, duke iu referuar marrëveshjes së arritur mes Shteteve të Bashkuara dhe Iranit për t’i dhënë fund armiqësive.

Dokumenti përmend disa herë Trump dhe vlerëson rolin e tij në arritjen e marrëveshjes që, sipas liderëve të G7, ndihmon në rihapjen e Ngushticës së Hormuzit.

Vendet e grupit zotohen gjithashtu të shtojnë dërgesat e sistemeve të mbrojtjes ajrore, interceptorëve dhe kapaciteteve me rreze të gjatë veprimi për Ukrainën. Në deklaratë përmendet edhe mundësia e zgjerimit të licencave që do t’i lejonin Kievit të rrisë prodhimin ushtarak vendas.

Të martën, Trump la të kuptohej se mund të rikthejë sanksionet ndaj naftës ruse, të cilat Uashingtoni i kishte pezulluar deri në mesin e muajit qershor.

Presidenti francez Emmanuel Macron tha se vendimet e marra në samitin e Evianit mbështeten nga të gjitha vendet e G7, përfshirë Shtetet e Bashkuara.

Deklarata përshëndet gjithashtu marrëveshjen SHBA-Iran dhe mbështet një mision ndërkombëtar të drejtuar nga Britania e Madhe dhe Franca për mbrojtjen e lundrimit dhe lehtësimin e tregtisë në Ngushticën e Hormuzit. Dokumenti përfshin edhe qëndrimin e vendeve të G7 kundër çdo përpjekjeje të njëanshme për të ndryshuar status quo-në në Detin e Kinës Lindore, Detin e Kinës Jugore dhe në Ngushticën e Tajvanit.

Në samitin e Evianit, liderët e G7 ranë dakord edhe për deklarata të veçanta politike mbi partneritetet globale, luftën kundër kancerit, koordinimin e përgjigjes ndaj Ebola-s, luftën kundër trafikut të drogës dhe goditjen e rrjeteve të kontrabandës së emigrantëve. Të mërkurën ata pritet të miratojnë gjithashtu deklarata për mineralet kritike dhe mbrojtjen e fëmijëve në internet.

Rendit zhvillimet sipas orarit:
Ora 16:17
Trump në G7: Nëse Irani nuk sillet mirë, do të fillojmë të hedhim bomba përsëri!

1780862673_donaldtrump.jpg

Presidenti i SHBA-së, Donald Trump, kërcënoi sot se do të rifillojë "hedhjen e bombave" nëse Irani "nuk sillet mirë", dy ditë pas nënshkrimit të një memorandumi mirëkuptimi midis Uashingtonit dhe Teheranit në Zvicër.

"Nuk është një tekst përfundimtar, është një protokoll marrëveshjeje", tha Trump në një takim dypalësh me Presidentin egjiptian Abdel Fatah al-Sisi në margjinat e samitit të G7 në Evian, "dhe nëse nuk më pëlqen, nëse ata nuk sillen mirë, ne do të fillojmë të hedhim bomba mbi kokat e tyre përsëri".

Iranianët, shtoi Trump, "janë sjellë keq për 47 vjet", duke iu referuar përsëri rënies së Shahut, një aleat i SHBA-së, dhe themelimit të Republikës Islamike në vitin 1979. Trump më pas përsëriti se Shtetet e Bashkuara nuk do të investojnë në Iran sipas marrëveshjes së arritur për t'i dhënë fund luftës, detajet e së cilës ende nuk janë bërë zyrtarisht publike.

"Është e rreme", tha Trump, duke iu referuar raporteve për investime të planifikuara amerikane në Iran sipas marrëveshjes. "Ne nuk do të investojmë as 10 cent" në Iran.

R.Xh/Shqiptarja.com