Droga 1.1 ton në Kakavijë, oficeri
grek: Ishte fshehur në 700 pako

Zbulohen detaje të reja nga operacioni që solli sekuestrimin e 1.1 ton drogë nga pala greke pak muaj më parë në pikën kufitare të Kakavijës, e cila ishte fshehur brenda 700 pakove të paketura.
 
Kjo sasi ishte mbyllur me kujdes në pjesën ballore të karocerisë së kamionit, pjesë kjo që ishte modifikuar me shumë kujdes nga trafikantët.
 
Duke parë kapjen nga grekët të kamionit shqiptar të mbushur me drogë dhe duke analizuar veprimet e palës shqiptare, janë krijuar dyshime të forta se punonjësit e doganës së Kakavijës, kishin abuzuar me detyrën e tyre,duke lejuar kalimin e kamionit.
 
Prokurorët shqiptarë janë vënë në kontakt me oficerin grek në Ambasadën Greke Kostandinos Markos, i cili i ka vënë në dijeni se kamioni i markës “Chrysler” me targa “AA 143 OS” është kapur me 1 ton e 147 kg drogë.
 
Sipas oficerit grek, kjo sasi e madhe droge ishte paketuar në 700 pako dhe se ishte fshehur në pjesën e përparme të karocerisë.
 
Sipas të dhënat që oficeri grek Kostandinos Markos i ka dhënë palës shqiptare, shtetasi tashmë në kërkim Qamil Muçaj, ia ka blerë kamionin shtetasit Antonjo Dufo nga Kavaja.
 
Ky kamion ka dalë disa herë në kufiri midis Shqipërisë dhe Greqisë. Pas marrjes së këtyre të dhënave dhe verifikimit të pozicionit të doganierëve, prokuroria, urdhëroi pak ditë më parë arrestimin e 5 zyrtarëve të pikës kufitare Kakavijë mes tyre: Ylli Rustemi, doganier pranë Doganës Kakavi, Gjirokastër, Vladimir Skrapalliu, inspektor policie pranë Pikës së Kalimit Kufitarë Kakavi, Blerim Mëhilli, inspektor policie pranë Pikës së Kalimit Kufitarë Kakavi, Klement Budo, inspektor policie pranë Pikës së Kalimit Kufitarë Kakavi, shpallur në kërkim dhe Qamil Muçaj, banor i fshatit Hekal, Fier, pronari dhe shoferi i kamionit, shpallur në kërkim
 

dy.b/shqiptarja.com