Duma: Rama shkel ligjin, nuk
deklaron në doganë pikturat e tij

TIRANE - Partia Demokratike akuzoi këtë të shtunë kryeministrin Edi Rama se është duke shkelur ligjin. Për këtë të djathtët i referohen faktit që shefi i qeverisë nuk deklaron në doganë pikturat e tij të cilat i ekspozon në shtete të ndryshme ku ka kryer vizita zyrtare.
 
Në një deklaratë për mediat nga selia blu, sekretarja për Marrëdhëniet me Publikun Grida Duma, paraqiti disa tabela, të cilat sipas saj vërtetojnë mosdeklarimin e pikturave të kryeministrit. 

Deklarata e plote e Grida Dumes
Çfarë kuptimi do kishte shteti i të padrejtës, shteti i korruptuar e kriminal që ka ngritur Edi Rama, nëse ai vetë nuk do të ishte në krye të shkeljes dhe dhunimit të ligjeve dhe Kushtetutës. E ka bërë këtë në mënyrë të përsëritur për interesat e tij politike. E ka bërë dhe vazhdon ta bëjë edhe për interesin e tij privat dhe personal.
Kodi Doganor, është një nga ligjet e vendit, që Edi Rama e ka shkelur këto dy vite në mënyrë të përsëritur.

Në këto tabela që ju shihni në ekran, janë të gjithë deklarimet për pikturat që kanë kaluar kufinjtë e vendit, dhe ka deklarim edhe kur ato janë kthyer.
Shikojini me kujdes.

Mungojnë pikturat e Edi Ramës. Edhe pse ai e ka kthyer postin kryeministror në një agjensi private ekspozitash me turizmin e tij piktoresk nga Gjermania në Kinë nga Italia në Stamboll.

Por Edi Rama, nuk deklaron pikturat që nxjerr jashtë për ti shitur me etiketën e kryeministrit të Shqipërisë. Ai i fsheh, duke shkelur ligjin.

Ndonëse Kodi Doganor kërkon që këto të deklarohen, Edi Rama e ka përjashtuar veten nga deklarimi. Fermeri që nuk tregon kuponin për një kile qepë në burg. Berberi që nuk pret kuponin në burg.

Edi shkon e vjen në botë me pikturat e tij kryeministrore pa deklaruara asgjë, pa i hyrë ferrë në këmbë.  Ligji nuk ka forcë ndaj tij. Kjo është një tjetër dëshmi e shtetit të padrejtës. Ky është Aparteidi i Edi Ramës ku sundojnë mbi ligjin e kundër ligjit ai, sajmja i drogës, beqja i tenderave, gjiknurët e cezit, ahmetaj-ryshfetaj e një grusht carapulësh, papulësh e nushësh.

Dëshmi e faktit se ligji dhe ndëshkimi i ligjit janë për qytetarët, jo për kryeministrin e vendit.

Kështu, Edi Rama e ka shpallur veten të paprekshëm, ashtu siç bëri edhe me imunitetin që i dha vetes në parlament duke mos lejuar hetimin për vjedhjen e shekullit, aferën CEZ, më të rëndën në historinë e vendit.  Këto padrejtësi do të marrin fund. Populli është në këmbë, dhe shteti i korruptuar, i padrejtë dhe kriminal i Edi Ramës do të shkulet nga themelet njësoj si bunkeri.

Koha e maskarenjve, koha e kësaj qeveria ka mbaruar.


Deklarimet ne Dogane, ku mungojne pikturat e Edi Rames

Redaksia Online
(Gre.M/Shqiptarja.com)