Durrës- Një vajzë 12-vjeçare është dërguar nga prindërit me urgjencë, nga Sukthi në spitalin rajonal Durrës, por për fat të keq nuk ka arritur të mbijetojë.

Sipas burimeve, vajza ka mbërritur me dhimbje dhe kriza dhe pavarësisht ndërhyrjes së mjekëve, koha nuk mjaftoi që të transportohej për mjekim më të specializuar drejt Spitalit të Tiranës.

Ndërkohë që dyshohet se shkak për humbjen e jetës është bërë hemorragjia cerebrale.

Gazetari i Report Tv, Aldo Mustafa, informon se me mbërritjen në spital, e mitura është shtruar menjëherë në reanimacion, por fatkeqësisht nuk ka mundur të mbijetojë.

Pacientja ka pasur kriza konvulsive, sipas burimeve dhe ka mbërritur në spital në orën 09:30 me autoambulancë. Deri në 10:30 ka marrë trajtim në Pediatrinë e Urgjencës.

Është kërkuar që të bëhet rezonancë koke, por për shkak të konvulsioneve të rishfaqura ka qenë e pamundur. Ka filluar trajtimi nga mjeku neuropediatër për të dominuar konvulsionet dhe temperaturën deri në 38.5 gradë.

Pasi është stabilizuar rreth orës 16:00, është bërë i mundur transferimi për të bërë skaner. Megjithë artefaktet e shumta nga lëvizja evidentohet hemorragjia cerebrale dhe pacientja merret nga reanimatorët, të cilët e intubuan për shkak të rënies së vlerave të oksigjenit.

Burime nga spitali shprehen se pacientja nuk ka dalë dot nga gjendja, duke u përkeqësuar dhe rreth 18:30 të mbrëmjes ndrroi jete. Për rastin po kryhen edhe veprime proceduriale për të zbardhur shkakun zyrtar të humbjes së jetës dhe rrethanat.

Policia e Durrësit reagoi pas ngjarjes duke njoftuar se ka nisur hetimet për rastin.

Janë pyetur mjekët dhe paraprakisht kemi të bëjmë me vdekje për shkak të hemorragjisë cerebrale. Në spital kanë qenë dy gjyshërit të cilët e kanë shoqëruar vajzën në spital. Nga kartela mjekësore rezulton se vajza ka pasur gjakderdhje të vazhdueshme në kokë shumë agresive. Gjithashtu do t’i nënshtrohet ekspertizës mjeko-ligjore për të përcaktuar shkakun e vdekjes.

Materialet i kanë kaluar Prokurorisë Durrës. Hetimi do të plotësohet me dëshminë e shkollës dhe të të afërmve të të miturës.