Pesë nxënës të një shkolle 9-vjeçare në Durrës kanë shfaqur simptoma helmimi pasi kanë konsumuar hamburger, sanduiç dhe byrekë gjatë kohës që ishin në shkollë. Ngjarja ka ndodhur një ditë më parë, ku 5 nxënësit e shkollës “Eftali Koçi” janë dërguar me urgjencë në spital.

Nxënësit e klasës së 5-të, D.R K.N, L.B. F.Xh dhe F.H, vjeç 11, 11, 12, 11 e 11, banues në Durrës, janë dërguar në spital me të vjella e marrje mendsh. Ngjarja u regjistrua dje. Fëmijët janë mjekuar dhe u larguan nga urgjenca pa probleme për shëndetin.

Policia raporton se fëmijët kanë konsumuar ushqime të shpejta pranë një kioske. Kioska ndodhet pranë shkollës. AKU ka nisur kryerjen e analizave për ushqimet që konsumuan fëmijët.

"Më datë 22.01.2018, shtetasit D.R K.N, L.B. F.Xh dhe F.H, vjeç 11, 11, 12, 11 e 11, banues në Durrës, nxënës në klasën e pestë të një shkolle 9-vjeçare kanë konsumuar në shkollë disa produkte ushqimore si haribo, byrek, hamburger e sanduiç dhe më pas kanë ndjerë shqetësime me dhimbje e të vjella, të cilat pasi kanë marrë mjekim në urgjencën e Spitalit Rajonal, janë larguar pa probleme për shëndetin. Materialet u referuan në Prokurorinë e Rrethit Gjyqësor Durrës, për vlerësim", thuhet në njoftimin e policisë. 

Lidhur me ngjarjen ka reaguar edhe Ministria e Arsimit dhe Sporteve. "Sqarim për rastin e fëmijëve në shkollën 9-vjecare ‘Eftali Koci’ të Durrësit. 
Dje nxënësit kanë blerë produkte tek ambulantët gjatë pushimit të gjatë në kangjellat e shkollës dhe pasi i kanë konsumuar nuk janë ndier mirë. Të 5 fëmijët janë dërguar për kontroll në spital nga drejtori i shkollës. U njoftua ISHP për ngjarjen dhe policia bashkiake për largimin e ambulantëve. Sot fëmijët zhvilluan mësimin normalisht në shkollën e tyre".

Redaksia Online
l.q/Shqiptarja.com