Durrës- Operacioni për lirimin e hapësirave publike në zonat urbane dhe bregdet po vijon nga institucionet ligjzbatuese.

Policia e Durrësit bëri sot me dije se ka pastruar edhe plazhin e Gjirit të Lalzit në kuadër të aksionit të koduar “Plazhi i lirë”, duke sekuestruar 1566 komplete me çadra dhe shezlongë, ndërsa procedoi penalisht edhe 14 persona që kishin këto plazhe në përdorim dhe i shfrytëzonin hapësirat publike në mënyrë të paligjshme.

“Shërbimet e Stacionit të Policisë Manzë, në kuadër të plan-operacionit "Plazhi i lirë", kanë vijuar kontrollet përgjatë gjithë vijës bregdetare, me qëllim lirimin e hapësirave publike që zihen pa lejen përkatëse nga subjektet në bregdet, duke vënë çadra dhe shezlongë. Gjatë kontrolleve, në disa hapësira publike, në plazhin e Gjirit të Lalzit, u hoqën dhe u sekuestruan në total 1566 komplete me çadra dhe shezlongë, që ishin vënë në mënyrë të paligjshme nga 14 shtetas”, bëri me dije policia vendore.

 Në vijim të veprimeve, u referuan materialet në Prokurori ku nisi procedimi në gjendje të lirë për të gjithë të dyshuarit.

Shërbimet e Policisë do të vijojnë kontrollet përgjatë gjithë vijës bregdetare, me qëllim lirimin e hapësirave publike, për pushuesit, dhe verifikimin e aktiviteteve që kryejnë subjektet, gjatë sezonit veror.

Përsonat e proceduar:
V. B., 28 vjeç, banues në Draç, Durrës;
E. L., 47 vjeç, banues në Tiranë;
D. K., 60 vjeç, banues në Shijak;
E. L., 33 vjeç, banues në Hamallaj;
L. M., 24 vjeç, banues në Shijak;
S. K., 31 vjeç, banues në Ishëm;
S. I., 57 vjeç, banues në Ishëm;
J. B., 38 vjeç, banues në Tiranë;
A. F., 53 vjeç, banues në Manzë;
Q. D., 30 vjeç, banues në Tiranë;
A. C., 39 vjeç, banues në Manzë;
L. L., 50 vjeç, banues në Tiranë;
F. A., 47 vjeç, banues në Tiranë;
E. Q., 59 vjeç, banues në Tiranë.